Ministru Estadu Koordenadór Asuntu Ekonómiku (MEKAE) no Ministru Turizmu Komérsiu no Indústria interinu, Fidelis Manuel Leite Magalhães, lidera enkontru interministerial ba dezenvolvimentu turizmu. Imajen/Tatoli.

DILI, 24 outubru 2019 (TATOLI)- Ministru Koordenadór Asuntu Ekonómiku (MKAE) konvoka reuniaun interministeriál hodi ko’alia kona-ba dezenvolvimentu turizmu iha Timor-Leste (TL).

Enkontru Komité Interministeriál ne’e lidera hosi MAKE interinu, Fidelis Manuel Leite Magalhães, no partisipa hosi Ministru Obra Públika (MOP), Salvador Eugénio Soares dos Reis Pires, Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, Sekretáriu Estadu Ambiente (SEA), Demétrio do Amaral de Carvalho, Sekretáriu Estadu Arte no Kultura, Teófilo Caldas, reprezentante hosi Ministériu Defeza no Seguransa, Ministériu Transporte no Komunikasaun, Ministériu Finansa, parseiru internasionál Banku Aziátiku Dezenvolvimentu (ADB), no Asesór Prinsipál Ministériu Turizmu, Komérsiu no Indústria.

“Enkontru ne’e marka istória no mós nu’udar indikadór ba Governu Daualuk ninia kompromisu atu diversifika ekonomia no kria postu serbisu atu dezenvolve ita-nia rain. Depende ba previzaun ba ita-nia nasaun nia kreximentu ekonómiku porsentu lima”, MKAE interinu ne’e afirma iha ámbitu reuniaun komité interministeriál iha Sentru Konvensaun Dili (CCD, sigla portugés), ohin

Ministru Estadu Koordenadór Asuntu Ekonómiku (MKAE) no Ministru Turizmu Komérsiu no Indústria interinu, Fidelis Manuel Leite Magalhães. Imajen/Tatoli.

Fidelis hatutan Governu Daualuk nia ambisaun atu atinje país ida rendimentu médiu altu iha 2030, entaun presiza kreximentu anuál porsentu hitu.

Hodi salienta Governu enfrenta situasaun ida iha ne’ebé país depende barak liu ba iha setór mina-rai, maibé ida ne’e la taka dalan katak investimentu boot iha setór ne’e loke dalan para bele kapitaliza hodi nune’e halo boot dezenvolvimentu iha área sira seluk ne’ebé la’ós mina-rai.

MKAE interinu ne’e afirma, pilár importante ekonomia Timor-Leste nia maka mina-rai, maibé Governu aproveita kondisaun ne’ebé setór ne’e fó para dezenvolve fali área sira seluk.

“Setór sira seluk demora liu no ninia kapasidade atu filtra osan to’o komunidade nia liman ne’e kleur liu se kompara ho setór ida ne’ebé maka importante no Timor iha poténsia boot tebes maka turizmu, más turizmu mesak labele, tenke iha estrada, seguransa no bee”, dehan Fidelis.

Iha enkontru dahuluk komité interministeriál, governante ne’e katak, haree ba dezenvolvimentu turizmu iha Timor-Leste, ho koordenasaun MKAE ho MTKI atu dezenvolve liután setór ne’e no rezolve pendente sira.

“Dezafiu ne’ebé hasoru hodi dezenvolve turizmu la’ós de’it iha Ministériu Turizmu nia liman laran, maibé mós relasaun ho ministériu sira seluk nia servisu hanesan, estrada, imigrasaun, asesu ba kréditu, bee no saneamentu”, katak Fidelis.

Dezenvolve Setór Turizmu Tenke Iha Infraestrutura

Atuál Ministru Reforma Lejizlativa Asuntu Parlamentár (MRLAP) hatete dezenvolvimentu turizmu iha Timor-Leste durante tinan hirak nia laran seidauk sai prioridade dahuluk tanba prioridade importante liu atu dezenvolve área ne’e tenke iha infraestrutura sira, nune’e hadi’a uluk infraestrutura no prontu ona maka dezenvolve fali turizmu.

“Se lae tempu ida dezenvolve sítiu turístiku iha fatin ida sein asesu ba estrada, bee ne’e maske sítiu ne’e dezenvolve di’ak no kapás mós ema sei la bá, no gasta de’it osan ba manutensaun”, ministru dehan.

Tanba ne’e maka Ministru Turizmu, Komérsiu no Indústria interinu ne’e afirma Governu evita hodi seidauk halo konstrusaun no tinan oin aloka orsamentu ba prioridade planu mestre ba turizmu hodi identifika katak poténsia ne’ebé importante presiza dezenvolve, presiza rekursu saida, tipu investimentu saida no bele loke ba turizmu modelu saida, buat sira ne’e tenke la’o no iha planu integradu.

“Ha’u dehan ona ba entidade sira iha área turizmu nian katak Governu laiha tempu para lakon tempu ba turizmu nian, tanba ita-nia PEDN hotu iha 2030, mundu nia ekonomia muda lalais tebes, úniku poténsia boot para atu halo ita sai hosi ki’ak maka turizmu”.

Notísia relevante : Sei Halo Planu Mestre ba Setór Turizmu Hodi Kontribui ba Ekonomia

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here