Ministru Estadu Koordenadór Asuntu Ekonómiku (MEKAE) no Ministru Turizmu Komérsiu no Indústria (MTCI-sigla portugés) interinu, Fidelis Manuel Leite Magalhães. Imajen Jogerjo Guterres.

DILI, 26 setembru 2019 (TATOLI) – Ministru Koordenadór Asuntu Ekonómiku (MKAE) no Ministru Turizmu, Komérsiu no Indústria (MTKI) interinu, Fidelis Manuel Leite Magalhães, afirma Governu iha tinan oin sei foka liu ba halo planu mestre iha setór turizmu nian atubele identifika fatin potensiál iha Timor-Leste, nune’e bele kontribui ba ekonomia Timor-Leste.

“Planu mestre ne’e katak ba iha área hotu- hotu hanesan mapa jerál ida hodi Governu bele identifika ho fásilmente zona ida ne’e ita rezerva ba iha otél estrela lima, zona ida ne’ebá rezerva iha turizmu komunitáriu no zona ida ne’ebá ita rezerva liu ba laiha turizmu relijioza”, dehan Ministru Fidelis iha Salaun João Paulo II Komoro, ohin.

Tanba ne’e maka halo planu mestre iha tinan oin ne’e atu Governu atinje meta no objetivu ne’ebé iha tinan hirak nia laran.

Nia dehan kuandu liuhusi planu mestre ne’e maka sei mai ho mós mapeamentu ida atu nune’e Governu fásil hodi halo identifikasaun ba tipu zona poténsia turizmu sira ne’e iha Timor-Leste, atu nune’e oinsá bele konstrui ho di’ak fatin turístika, nune’e bele dezenvolve di’ak liután setór ne’e.

“Tanba ita daudaun ne’e depende liu ba iha setór mina no gás, maibé ho planu mestre ne’ebé iha área turizmu Governu atu halo tinan oin ida ne’e, ita bele halo ona diversifikasaun”, tenik Fidelis.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here