Autoridade Lokál No Lia Nain Husi Suku Kribas partisipa konsultasaun públiku ba Lei Kostumieru ho Justisa Tradisionál. Imajen/Nelson Sousa

LACLUBAR, 23 outubru 2019 (TATOLI)-Autoridade lokál no lia nain hosi Postu Administrativu Laclubar, Munisípiu Manatuto, konsidera programa oitavu governu ba reforma justisa importante tebes, oinsá atu hadi’a sistema justisa iha Timor-Leste hodi fó  asesu justisa ba povu ho dignu.

Notísia Relevante : MRLAP Kontinua Halo Konsulta Públiku Kona-ba Lei Kostumeiru ho Justisa Tradisionál

Apresiasaun autoridade lokál ho lia nain sira nian nee introdús direita liuhosi sorumutuk, ohin, ho ekipa Ministériu Reforma Lejizlativa no Asuntu Parlamentár (MRLP)  através konsultasaun públiku ba Lei Kostumeiru no Justisa Tradisionál ho komunidade Laclubar iha Laklubar.

Administradór Postu Administrativu Laclubar, Natalino Martins Carvalho konsidera, konsultasaun públiku ne’e bele lori komunidade nia aspirasaun ne’ebé durante  iha  hodi elabora planu ne’ebé di’ak atu grante justisa ba ema hotu hanesan.

Durante ne’e Administradór Postu Administrativu Laclubar, pratika duni uzu kostume tradisionál hodi regula komunidade hanesan tara bandu no rezolve konflitu sosiál sira. Maibé ladún iha forsa legál tanba ne’e ho Lei Kostumeiru no Justisa Tradionál bele ajuda fó poder atu disputa ki’ik sira la presiza to’o tribunal.

Iha fatin hanesan Xefe Suku Orlalan, Carlos Jose Alves dehan, polítika governu nian atu legaliza Lei Kostumeiru ho Justisa Tradisionál  fó vantajen boot atu minimiza prosesu kazu pendente iha tribunal no ajuda rezolve kazu sivíl sira liuhosi lei refere.

Asesora Jurídiku MRLAP, Melisa Caldas hatete, polítika governu da-ualu garante sistema justisa duni ba povu. Tanba ne’e, konsultasaun públiku ne’e bele hetan informasaun adekuada hodi ajuda elabora lei kostumeiru ho justisa tradisionál tuir ábitu no lisan étniku ho  lisan ida-idak nian.

Partisipa iha konsultasaun ne’e autoridade lokál hosi suku  neen, kompostu hosi Suku Manelima, Batara, Orlalan, Funar, Fatu Makerek, Sana Nain ho lia nian sira hosi étniku ne’ebé pertense ba  Laclubar.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here