Koordenadór Gabinete Jurídiku MEJD, Hermenegildo Magno Gomes. Foto TATOLI: Tomé Amado

DILI, 23 outubru 2019 (TATOLI)- Ministériu Edukasaun Juventude no Desportu (MEJD) liuhusi Gabinete Jurídiku kontinua halo diseminasaun kona-ba lei tolu ne´ebé tama ona iha vigór ba iha dirijente eskola, adjuntu no Gabinete Apoiu tékniku (GAT) sira iha munisípiu 12 inklui RAEOA (Rejiaun Autonoma Administrativa Espesiál Oe-cuse-Ambeno).

Dekretu lei tolu ne´e mak hanesan dekretu lei númeru 23/2010, dekretu lei 33/2011 no dekretu lei númeru 7/2010.

Koordenadór Gabinete Jurídiku MEJD, Hermenegildo Magno Gomes informa katak kazu ida ne´ebé to´o agora seidauk bele rezolve mak pagamentu retroativu ba profesór sira.  “Ida ne´e ita konsidera nu´udar lakuna,” hateten Koordenadór Hermenegildo Gomes ba jornalista sira iha salaun Ian Martin Matadouru, kuarta (23/10/2019).

Nia esplika katak problema retroativa ne’e kabe ba dekretu lei númeru 23/2010 haree kona-ba estatutu da karreira dosente, ninia entrada vigór ne’e hahú iha 2011. Husi tinan ida ne’e mai to’o iha 2019 mak governu konsidera. “Kuandu husi tinan sira ne’e mak governu halo avaliasaun dezempeñu mak muito bom entaun tinan rua sei muda ninia eskalaun”.

Koordenadór Gabinete Jurídiku MEJ ne´e akresenta, estatutu dosente ne’e iha kategoria tolu mak presiza haree mak  dosente asistente, profesór no profesór seniór. Agora atu hetan mudansa husi pozisaun profesór ba profesór seniór tuir lei refere tenke liuhusi teste. “Ida ne´e la´ós foti de’it husi prosesu avaliasaun dezempeñu”.

“Entaun husi aplikasaun dekretu lei ne’e mós dala ruma ladun fó benefísiu ba estatutu karreira dosente sira nian. Ne’e duni, MEJD mós iha ona planu kuandu mosu lakuna barak demais entaun posibilidade bele halo alterasaun,” nia konsidera.

Nune’e mós, tuir Koordenadór Hermenegildo Gomes, kona-ba dekretu lei númeru 33/2011 kona-ba rejime jurídiku administrasaun, jestaun no sistema ensinu sekundáriu inkkui mós dekretu lei númeru 7/2010 ko´alia mós kona-ba réjime jurídiku administrasaun, jestaun no sistema ensinu báziku nian.

Objetivu husi dezaminasaun ne’e atu halibur input husi dirijentie eskola sira kona-ba dekretu lei tolu ne’e depois Gabinete Juridíku sei aprezenta fali ninia rezultadu dezaminasaun ne’e ba ministériu atu konsidera, kuandu domina ho lakuna, tinan oin sei halo alterasaun.

Notísia relevante:MEJD Kontinua Disemina Dekretu Lei Tolu Ba Dirijente Eskola Sira

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here