Logotipu MEJD

DILI, 22 outubru 2019 (TATOLI)-Ministériu Edukasaun, Juventude no Desportu (MEJD) liuhusi Gabinete Juridiku kontinua disemina dekretu lei tolu ba diretór eskola sira iha munisípiu.

Koordenadór Gabinete Jurídiku MEJD, Hermenegildo Gomes informa, prosesu diseminasaun dekretu lei tolu ba diretór, adjuntu, Gabinete Apoiu Tékniku (GAT) no responsável eskola sira hala’o ona iha rejiaun haat no agora kontinua fali iha Munisípiu Dili depois mak RAEOA (Rejiaun Autónoma Espesiál Oe-cusse-Ambeno).

Diseminasaun  dekretu lei tolu ne’e atu fahe informasaun ba dirijente eskola sira atu hatene didi´ak lala´ok dekretu lei refere.

“Ami konsege disemina ona dekretu lei tolu ne’e ba rejiaun haat husi munisípiu 11. Agora ami kontinua halo fali iha Dili hahú iha kuarta 23 outubru 2019 ho intensaun atu fahe informasaun ba ita-nia dirijente eskola sira atu bele komprende didi´ak funsionamentu dekretu lei tolu ne’ebé prodús tiha ona iha 2016 liubá,” friza Koordenadór Hermenegildo Gomes ba Ajénsia TATOLI iha ninia kna’ar fatin, MEJD Vila Verde, tersa (22/10/2019).

Nia informa katak dirijentie eskola sira iha obrigasaun atu hatene didi´ak lei tolu ne’e hodi bele tulun malu atu aselera progresu  iha eskola sira.

Koordenadór ne’e esplika maske dekretu lei ne’e iha ona maibé dirijente eskola sira seidauk komprende didi´ak sira nia kna’ar. Dala barak kompeténsia ne’e sei monopoli husi Diretór estabelesimentu ensinu sira.

“Loloos ne’e kada eskola ninia funsionamentu tenke koletiva. Signifíka diretór, adjuntu Gabinete Apoiu Tékniku no koordenadór sira tuur hamutuk mak hamosu desizaun ruma ba progresu eskola nian la´ós diretór ninia desizaun mesak,” nia konsidera.

Notísia relevante:Ekipa Gabinete Jurídiku MEJD Rekolla Problema Neen Aprezenta Ba Ministériu

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here