Primeiru-Ministru, Taur Matan Ruak. Imajen Tatoli/Cipriano Colo

DILI, 22 outubru 2019 (TATOLI)–Primeiru-Ministru, Taur Matan Ruak, hateten bainhira laiha dalan atu rezolve membru Governu pendente, bele ba fali eleisaun antesipada.

“Ha’u ohin ko’alia ho Prezidente Repúblika, dalaruma dalan laiha atu fó pose ba membru Governu pendente, ita bele ba fali eleisaun de’it karik”, Taur deklara hafoin hala’o enkontru semanál ho Prezidente Repúblika (PR), Francisco Guterres Lú Olo iha Palásiu Prezidente Nicolau Lobato, Bairru Pité, tersa ne’e.

Lee mós: Deputada Olinda Kontinua Ezije Rezolve Membru Governu Pendente

Xefe Governu haktuir, nia ho Xefe Estadu ko’alia duni kona-ba asuntu ne’e (lista pendente), maibé daudaun ne’e seidauk iha solusaun.

Xefe Governu ne’e mós akresenta katak bainhira parte hotu hakarak atu avansa ba eleisaun antesipada, nia sei fó apoiu másimu atu bele realiza.

“Bainhira hotu-hotu hakarak ba eleisaun antesipada, laiha problema no ha’u mós apoiu. Ba ha’u di’ak de’it. Ita ba eleisaun antesipada mós bele”, nia afirma.

Kona-ba preokupasaun públiku katak Oitavu Governu maioria membru sira mai hosi Partidu Libertasaun Populár (PLP) mak domina, Taur rejeita katak la loos tanba membru Governu sira ne’ebé seidauk simu pose sei asume hela interina hodi ezekuta programa, no bainhira simu ona pose, sei hala’o mós kna’ar.

Taur mós otimista no garante nafatin katak maski membru Governu inkompletu, maibé laiha impaktu ba ezekusaun orsamentu jerál Estadu (OJE) 2019 no iha progresu.

Maski nune’e, nia husu nafatin ba membru Parlamentu Nasionál atu hala’o serbisu hanesan baibain.

“Ha’u husu ba Parlamentu Nasionál atu hala’o serbisu hanesan baibain. Governu halo esforsu atu serbisu la’o nafatin duni “, nia apela.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here