Sesaun plenária Parlamentu Nasionál. Imajen/Tatoli

DILI, 21 outubru 2019 (TATOLI) – Deputada Bankada Kmanek Haburas Unidade Nasionál Timoroan (KHUNTO), Olinda Guterres, kontinua ezije VIII Governu Konstitusionál ne’ebé lidera hosi Primeiru-Ministru (PM), Taur Matan Ruak, hodi buka solusaun ba membru governu pendente ne’ebé oras ne’e seidauk rezolve.

“KHUNTO mesmu partidu kiik maibé nia kuadru altamente kualifikadu hodi bele asume kargu polítiku ba ema na’in-rua hosi KHUNTO iha VIII Governu Konstitusionál, ne’ebé sósiu hosi partidu tolu hanesan Kongresu Nasionál Rekonstrusaun Timoroan (CNRT-sigla portugés), Partidu Libertasaun Populár (PLP) no KHUNTO. KHUNTO lakohi sai vítima ba polítika iha prosesu dezenvovlvimentu rai ida-ne’e no partidu iha direitu troka nia emar”, tenik Deputada Bankada Governu ne’e liuhosi sesaun plenária, segunda ne’e.

Notísia Relevante: AMP Legaliza Koligasaun Iha CNE

Kuadru husi partidu KHUNTO ne’ebé tama lista nu’udar membru governu indijitadu maka António Verdiál asume kargu nu’udar Ministru Interiór, enkuantu  José Turquel asume kargu hanesan Vise-Ministru Negósiu Estranjeiru no Kooperasaun.

Nia subliña, maski Deputadu António Verdiál ne’ebé antes ne’e tama iha lista no deklara rejigna-aan hosi lista, maibé KHUNTO disponível atu troka kuadru partidu na’in-rua ne’ebé Prezidente Repúblika (PR), Francisco Guterres ‘Lú Olo’ seidauk fó pose to’o agora.

“Polítikamente membru governu la kompletu hosi CNRT no KHUNTO, bele fó marjen boot ba PLP hodi asume hotu pasta ministériu ne’ebé maka tuir loloos KHUNTO no CNRT nian. Benefísiu polítika ne’e ba de’it PLP”, nia akresenta.

Ba asuntu ne’e,  Xefe Bankada CNRT, Duarte Nunes, husu ba partidu KHUNTO hodi bele hato’o proposta ba PM Taur, hafoin hato’o fali proposta ba Xefe Estadu.

“Sira (KHUNTO) nia direitu atu hato’o proposta”, nia dehan.

Hatán ba preokupasaun ne’e, Ministru Reforma Lejizlativa no Asuntu Parlamentár, Fidelis Leite Magalhães, hateten kona-ba asuntu ne’e, lideransa másimu Aliansa Mudansa ba Progresu (AMP) nian maka sei hola desizaun.

Governante ne’e argumenta, durante ne’e Governu prenxe hela kargu interinu ba pozisaun ne’ebé seidauk iha membru governu.

“Ha’u presiza halo defeza onra ida katak ami ezerse hela funsaun interinu ne’ebé intensaun atu kaer hotu funsaun mamuk. Ida-ne’e hanesan orientasaun polítika ita-nian ne’ebé hatete hanesan ne’e, independente ho situasaun konteksu polítika saida de’it atu desenvolvimentu labele para”, tenik Fidelis iha plenária.

Governante ne’e hatutan: “Ami hala’o kna’ar maibé ho sentidu devér la’ós opurtunidade atu hakna’ok ou atu hariku-aan no la’ós preveléiju pesoál”.

Entretantu, partidu tolu ne’ebé kompostu husi CNRT, PLP no KHUNTO, asina Plataforma Polítika Bankada Partidu Polítiku Parlamentu Nasionál iha loron 12 outubru 2017 ho naran Aliansa Maioria Parlamentár (AMP).

Plataforma koligasaun ne’e akontese fulan haat hafoin eleisaun parlamentár iha loron 22 jullu 2017 no membru deputadu foun lejislatura dahaat simu posse iha loron 5 setembru 2017.

Entretantu, membru governu  indijitadu ne’ebé Xefe Estadu seidauk fó pose mak hanesan Ministru Finansa, Helder Lopez, Ministru Turizmu, Komérsiu no Indústria, Francisco Kalbuadi Lay, Minstru Asuntu Kombatente no Libertasaun Nasionál, Virgílio Smith, Ministru Saúde, Sérgio Lobo, Ministru Interiór, António Verdial (deklara rezigna-aan ona), Vise-Ministru Justisa, Amandio Benevides, Vise-Ministru Negósiu Estranjeiru no Kooperasaun, José Turquel.

Enkuantu, ba kandidatu ba kargu Ministru Planeamentu no Investimentu Estratéjiku, Samuel Marçal ho Ministru Petróleu no Rekursu Minerál, Alfredo Pires, PR Lú Olo aseita fó pose, maibé kandidatu na’in-rua ne’e lakohi tanba hakarak fó solidariedade ba kandidatu membru governu nain-hitu seluk.

Jornalista : Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here