Espoza matebian Cirilio Cistovão nian, Brigida Coreia ho oan sira simu ho matawen mate isin eis ministru defeza Cirilio Cristovão iha Aeroportu Prezidente Nicolau Lobato, Dili, tersa (22/10/2019). Imajen/Eugénio Pereira

DILI, 22 outubru 2019 (TATOLI)-Ministru Defeza no Ministru Interiór interinu, Filomeno da Paixão de Jesus, rekoñese kontribuisaun  matebian eis Ministru Defeza, Cirilio José Jacob Valadares Cristovão nian, ne’ebé signifikante tebes ba dezenvolvimentu institusionál iha setór defeza no Serbisu Nasionál Intelijénsia (SNI).

Notísia Relevante : PM Taur Hato’o Sentida Kondolénsia ba Eis Ministru Defeza

Mate isin eis ministru defeza, Cirilio Cristovão to’o iha Dili ho aviaun Sriwijaya Air. Imajen/Eugénio Pereira

Ministru Filomeno dehan, uluk hanesan militár iha Komandu FALINTIL-Forsa Defeza Timor-Leste (F-FDTL) nia akompaña no koñese serbisu barak maka matebian Cirilio José Jacob Valadares Cristovão, hala’o bainhira asume kargu Ministru Defeza iha sestu Governu Konstitusionál konsege kria kooperasaun di’ak ho Ministériu Defeza Xina hodi apoiu ekipamentu ba Komandu F-FDTL.

“Ha’u hatene katak, nia serbisu hanesan Ministru Defeza nia fó kontribuisaun makas tebes ba Ministériu Defeza, no fó mós serbisu di’ak ba informasaun iha Serbisu Nasionál Intelijénsia (SNI)  liga ba defeza no seguransa nian atu  halo asaun ba situasaun ne’ebé akontese ho lalais,” hateten Filomeno da Paixão de Jesus, ba Ajénsia TATOLI, ohin, hafoin presta omenajen ikus ba matebian Cirilio Cristovão iha matebian nia hela fatin, Pantai Kelapa, Dili.

Filomeno Paixão hateten, mezmu matebian Cirilio Cristovão serbisu tinan rua de’it nu’udar Ministru Defeza (15 Marsu 2015 too 15 Marsu 2017), maibé fó formasaun barak ba pesoál sivíl  no militár sira, halo kooperasaun ho Governu Xina hodi fó apoiu lubuk ida iha lojístika hanesan, karreta kamioneta militár hitu (7), sapatu militár 600, kama hamutuk 3600 fó kompletu ba militár.

Durante matebian asume kargu ministru defeza,  hato’o mós proposta ba Governu Xina hodi kontinua fó apoiu ba Komandu F-FDTL iha 2019 too 2020 ba oin ne’ebé Governu Xina no Ministériu Defeza sei haree hela prosesu kooperasaun ne’e.

Tuir ajenda, kuarta (23/10),  Ministériu Defeza no família  sei lori mate isin ba edifísiu Ministériu Defeza no Komandu F-FDTL iha Kuartél Jenerál Fatuhada, Dili, hodi presta omenajen ho parade militár.

Hafoin presta omenajen, mate isin sei kontinua lori mós ba presta omenajen iha edifísiu Serbisu Nasionál Intelijénsia (SNI) Caicoli Dili no kontinua ho misa requiem iha Igreja Katedrál Dili.

Iha fatin hanesan, reprezentante Familia Uma Lisan “Cuno Ratu”, Horacio dos Santos hato’o agradese ba Governu liuhosi Ministériu Defeza hodi fó omenajen ba matebian.

“Ami família hato’o agradese ba governu hodi koordena ho ami para lori matebian ba hato’o omenajen iha Ministériu Defeza no Serbisu Nasionál Intelijénsia (SNI) depois sei remata ho misa iha Igreja Katedrál foin lori ba Lospalos,” Horacio hateten.

Hafoin misa remata, sei kontinua transporta matebian hosi Dili ba Aldeia Titilari, Suku Fuiluro, Postu Administrativu Lospalos, Munisipiu Lautem, sei rai mate isin durante loron haat, too sábadu (25/10) foin hala’o serimónia funerál ho parade militár.

Mate isin transporta hosi Bali mai Dili ho Aviaun Sriwijaya Air ne’ebé too Aeroportu Prezidente Nicolau Lobato, mate isin simu hosi família ho kultura uma lisan “Cunu Ratu” hamutuk ho reprezentante membru  hanesan, Ministru Negósiu Estranjeiru no Kooperasaun (MNEK), Dionisio Babo Soares ho membru governu inklui Eis Ministru Defeza no Seguransa, José Agostinho Sequeira “Somotxo”, Deputadu Parlamentu Nasionál Komisaun B Asuntu Defeza no Negósiu Estranjeiru, David Dias Ximenes “Mandati’  no Deputadu Bankada CNRT,  membru Bankada Partidu Demokrátiku (PD), inklui família no kolega sira seluk tan.

Jornalista : Eugénio Pereira

Editór       : Francisco Simões

2 KOMENTÁRIU

  1. Ami familia husi Lospalos Com lakon ami nia tio matenek no serviso makas ba Nação mate sedo deit 😢🙏♥️R.I.P. querido tio Cirilio 😢😢🙏🙏💐💐

  2. Hato´o ami nia condolencia ba matebian Sr.Cirilio Cristovão fila ona aman Maromak nia kadunan Santo, reza mos fo força nafatin ba Espoza no oan kiak nebe husik hela iha mundo.

    Adeuussss.

HAKEREK NO HATÁN

Please enter your comment!
Please enter your name here