DILI, 22 outubru 2019 (TATOLI) – Primeiru-Ministru (PM), Taur Matan Ruak, lamenta no sente triste ho notísia kona-ba falesimentu eis Ministru Defeza, Cirilo Cristóvão, ne’ebé fila hikas ona ba Aman Maromak nia Kadunan Santu.

Eis Ministru Defeza ne’e hakotu iis iha Bali Royal Hospital (BROS), Indonézia, domingu (20/10) iha tuku 19:46 oras Indonézia nian.

“Ha’u lamenta no sente triste bainhira rona katak eis Ministru Defeza husik ona mundu ida-ne’e. Cirilo Cristóvão nu’udar ema ida-ne’ebé ha’u koñese di’ak, ema ida-ne’ebé dedika-aan tomak ba dezenvolvimentu iha setór seguransa no defeza nian. Bainhira ha’u sei Prezidente Repúblika, ami na’in rua sempre hasoru malu beibeik iha Palásiu Prezidente hodi troka hanoin no ideia kona-ba serbisu iha setór seguransa no defeza ita-nia nasaun nian,” tenik Taur liuhusi komunikadu imprensa ne’ebé Tatoli asesu, ohin.

Aproveita tempu susar ne’e, PM lori VIII Governu Konstitusionál nia naran no nia naran rasik hamutuk ho família, hakarak hato’o sentidu pézames no kondolénsia ba família enlutada.

“Ita hotu harohan ba Na’i Maromak atu fó fatin rohan laek ba nia iha Reinu Lalehan,” nia dehan.

Entretantu, fó hanoin fali, Cirilo Cristóvão sai Ministru Defeza iha VI Governu Konstitusionál no simu pose hosi eis Prezidente Repúblika, atuál Primeiru-Ministru, Taur Matan Ruak, iha (16/02/2015) liubá.

Antes ne’e, matebian asume mós kargu nu’udar Xefe Komisaun Verdade no Amizade Timor-Leste-Indonézia no Diretór Jerál Serbisu Nasionál Intelejénsia.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here