eitór UNPAZ eleitu, Adolmando Soares Amaral. Foto TATOLI: Tomé Amado

DILI, 22 outubru 2019 (TATOLI)-Kandidatu númeru ida, Adolmando Soares Amaral, liuhusi eleisaun ida demokrátiku, eleitu nu´udar Reitór Universidade da Paz (UNPAZ) ba périodu 2019-2022.

Adolmando Amaral eleitu nu´udar reitór hafoin akumula votus válidu hamutuk 118 husi totál dosente 175 ne´ebé mak partisipa no kontribui sira-nia votus iha eleisaun ne´ebé kompete mós husi Akadémiku UNPAZ nian, Guido Gonsalves, ne´ebé depois akumula de´it votu 57 iha eleisaun ne´e.

Reitór UNPAZ eleitu, Adolmando Soares Amaral hateten, maske eleitu ona nu´udar reitór maibé ida ne´e nu´udar “todan” ida ne´ebé nia simu hodi la´o ba oin.

“Ha’u agradese ba maluk dosente sira ne’ebé fó ona votus konfiansa mai ha´u hodi lidera fali instituisaun akadémika ne’e ba tinan haat. Ita-boot sira-nia konfiansa ha’u sei kuidadu atu keta estraga iha dalan klaran,” kompromete Reitór UNPAZ eleitu, Adolmando Amaral iha entrevista ho Ajénsia TATOLI iha Salaun UNPAZ, ohin.

Signifika, tuir akadémiku ne´e katak responsabilidade bo’ot ne’e sei hala’o kabe ba programa prioridade ne’ebé antes ne’e nia hato’o ona iha kampañia. Aldomando dehan ninia mandatu ba tinan haat ne’e iha setór lima mak tenke halo reforma.

Setór sira ne´e mak akademia, administrasaun finansa, dirasaun asuntu estudante, asuntu estruturál no kooperasaun. Hafoin mak dudu fakuldade no programa estudu sira atu eleva sira-nia kualidade hodi nune’e bele hadi´a no transforma estatutu ho valór C ba fali B.

“Nu´udar alumni, ha’u iha mehi bo’ot hakarak hadi´a institutu ne’e tanba tinan 15 ha’u la´o hamutuk ho saudozu Eis-reitór Lucas da Costa husi kondisaun UNPAZ ida laiha liu buat ida to’o kondisaun ida agora,” nia garante.

Reitór foun ne’e afirma katak programa prioridade sira, nia hakarak ezekuta tanba antes ne’e iha ona avaliasaun husi Ministériu Ensinu Superió, Siénsia no Kultura (MESSK) ho ANAAA (Ajénsia Nasionál Avaliasaun no Akreditasaun Akadémika) nian ne’ebé la konsege fó akreditasaun ba departamentu balun.

Kuandu ida ne’e akontese, tuir alumni UNPAZ Aldomando Amaral ne´e, iha hanoin ida katak saudozu Lucas da Costa prepara ona kondisaun ba jerasaun foun sira agora, saida mak presiza halo atu kursu ne’ebé seidauk akredita bele hetan akteditasaun. Se ida ne’e mak la konsege di´ak liu lalika tan kontinua ninia obra.

“Nia halo ona investimentu, entaun ita sira iha ne’e kontinua habo’ot liuhusi programa estudu fakuldade no instituisaun tenke hetan hotu akreditasaun,” konsidera reitór eleitu ensinu superiór privadu, UNPAZ, ne´e.

Iha biban hanesan, kandidatu Guido Gonsalves apresia rezultadu eleisaun ne´e no konsidera katak “la sente lakon” eh derrotadu maibé ne´e prosesu ida no nia parte mós kompromete katak prontu koopera atu servisu hodi hadi´a fallansu no obstákulu sira ne’ebé instituisaun akadémika ne´e sei enfrenta.

Notísia relevante:Ohin, Eleisaun Ba Reitór UNPAZ

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here