DILI, 22 outubru 2019 (TATOLI)-Figura rua iha Universidade da Paz kompete iha eleisaun UNPAZ nian hodi bele sai reitór no lidera ensinu superiór privadu ne´e ba périodu 2019-2022 hodi substitui matebian Reitór Lucas da Costa, Rama Metan, ne´ebé hakotu iis iha Ospitál Nasionál Guido Valadares (HNGV) tanba moras.

Figura rua ne´e mak Adolmandu Soares Amaral no Guidu Gonsalves, nu´udar dosente permanente UNPAZ nian ne´ebé ho grau akadémiku doutoramentu ka PhD. Akadémiku UNPAZ rua ne´e kandidatadu tanba prienxe kritériu, tuir avaliasaun dokumentu ne’ebé ekipa komisaun ba eleisaun halo ona iha semana tolu liubá.

Ekipa Komisaun Eleisaun, Buras Martins hateten, kandidatu na’in rua ne´e  nu´udar figura ida ne’ebé iha poténsia bo’ot atu kontinua fali servisu ne’ebé Eis-Reitór, matebian Lucas da Costa husik hela hodi aselera mós planu no programa ne’ebé seidauk realiza. Kandidatu na’in rua ne’e iha ona programa prioridade ida-idak nian ne’ebé sei ezekuta iha tinan haat nia laran kuandu  eleitu nudar reitor.

Eleisaun ba reitór UNPAZ nian hahú  iha tuku 9h00 to’o 14h00 depois ne’e sei taka hodi fó biban ba ekipa susesu sira atu halo kontajen votus no halo apruramentu ba rezultadu finál hodi pronunsia se mak eleitu iha eleisaun ne´e.

Tuir Buras katak eleitór sira ne’ebé iha direitu  fó votu konfiansa ba iha eleisaun ne´e mak dosente permanente sita inklui xefe divizaun hotu iha UNPAZ nia laran. “Ita iha dosente permanente hamutuk 183 no xefe divizaun 12 ne’e mak iha direitu vota,” relata Xefe Komisaun Buras Martins perante profisionál komunikasaun sosiál sira iha salaun UNPAZ, ohin.

Iha biban hanesan, Fernando Gusmão nu´udar ekipa susesu ba kandidatu Adolmando Soares Amaral konsidera katak maske kandidatu na’in rua ne’e mai ho programa idaidak nian maibé intensaun ida de’it mak atu lori UNPAZ ba progresu.

Akadémiku ne´e hatutan, figura na’in rua ne’e  bele iha abilidade atu hatutan no halo buat foun iha instituisaun privadu ne’e. Esperansa katak manan ka lakon iha kompetisaun ne’e parte ida husi sistema demokrasia ne’ebé lao iha nasaun no prosesu dezenvolvimentu nu´udar responsabilidade dosente hotu nian.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here