Foto/Google.

DILI, 21 outubru 2019 (TATOLI) – Diretór Jerál Pekuária no Veterinária Ministériu Agrikultura no Peska (MAP), Domingos Gusmão, informa daudaun ne’e númeru fahi mate kauza husi Peste Suina Afrikana ka African Swine Fever (ASF) aumenta.

Númeru aumenta ne’e mai husi munisípiu hitu maka hanesan Dili, Baukau, Likisá, Ermera, Bobonaru, Manatutu no Manufahi.

“Dadus ne’ebé maka uluk ekipa tékniku veterináriu sira hato’o mai ha’u ne’ebé ami halo anunsia dahuluk ba moras fahi nian iha Dili mate 400, no foin daudaun sira hato’o tan hamutuk 4000 no sesta semana kotuk sira informa mai ha’u númeru fahi mate sa’e ba iha rihun 10, ita kompara karik 60%”, dehan Diretór Jerál Pekuária ne’e iha MAP Komoro, ohin.

Nia salienta husi munisípiu hitu ne’e aléinde Dili, Manufahi no Baukau mós rejista fahi mate barak. Tanba ne’e, husi Diresaun Nasionál Veterinária nia ekipa kontinua halo monitoramentu iha terrenu.

Nune’e mós husi MAP rasik sei konsulta ho Governu atu uza asaun rua hodi halo nu’udar maneira prevensaun ba moras ASF labele alarga tan bá munísipiu sira ne’ebé moras ne’e seidauk da’et.

“Ida maka halo blokeamentu ba fatin sira ne’ebé identifika rejista maka’as ona moras ASF no asaun seluk maka elemina fahi komunidade nian ne’ebé kona moras ASF nune’e labele hada’et ba iha komunidade sira seluk”, katak.

Nia esplika kona-ba blokeamentu rasik husi MAP ho nia ekipa téknika veterinaria rasik kontinua halo kontrolu ba postu tránzitu iha Hera, Tasitolu no Dare para prevene fahi nia movimentasaun no sobre eleminasaun ba fahi komunidade nian ne’e objetivu atu moras fahi labele hada’et tan ba fahi sira seluk.

Diretór Jeral Pekuaria ne’e husu ba komunidade sira atu hatudu konxiénsia karik hetan fahi maka kona moras ASF tenke hakohi, labele soe nune’e bele halo prevensaun ba peste suina ne’e rasik.

Notísia relevante : Fahi Hamutuk 2.145 Mak Mate Ona iha Munisípiu Haat

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here