Ministru Agrikultura no Peska Joaquim José Gusmão dos Reis halo enkontru estraordinária ho liña ministeriál sira hodi ko’alia kona-ba moras ASF.

DILI, 04 outubru 2019 (TATOLI) – Tuir dadus hosi Ministériu Agrikultura no Peska (MAP), hatudu katak fahi hamutuk 2.145 maka mate ona tanba kauza hosi moras Peste Suína Afrikana (PSA) ka African Swine Fever (ASF).

Dadus hirak ne’e hatudu, Munisípiu Dili, fahi hamutuk 627 maka mate ona, Ermera 860, Lautein 439 no Manatutu 219.

Tanba ne’e, Ministru Agrikultura no Peska, Joaquim José Gusmão dos Reis Martins, halo enkontru estraordináriu ho ekipa tékniku Ministériu Agrikultura no Peska (MAP) hamutuk ho liña ministeriál sira hodi husu atu forma ekipa taskforce hodi halo kontrolu másimu ba parte hotu atubele prevene no minimiza moras fahi.

“Ha’u ohin enkontru ho ekipa tékniku hosi Ministériu Agrikultura no Peska inklui liña ministeriál sira atu oinsá hamutuk hodi halo planu atubele forma ekipa taskforce halo prevensaun no minimizasaun ba moras ASF”, dehan governante ne’e hafoin enkontru iha salaun MAP, Komoro, ohin.

Nune’e maka presiza halo identifikasaun fatin hodi halo kontrolu, hanesan aeroportu, portu no supermerkadu hodi kontrola hahán sira liuliu hahán lata ne’ebé fa’an iha loja.

“Ha’u mós ohin orienta Alfándega liuhosi serbisu Kuarentena atu haree hodi halo kontrolu iha serbisu aeroportu no portu nian tanba lei Kuarentena rasik bandu hahán sira husi nasaun ne’ebé kona ona moras ASF labele mai. Ita rekoñese katak fasilidade iha ita nian aeroportu seidauk másima tanba ne’e husu ba Costums no Kuarentena atu halo kontrolu ne’ebé di’ak hodi prevene moras AFS”, sujere.

Nune’e, MAP sei kolabora ho Autoridade Inspesaun, Fiskalizasaun Atividade Ekonómika, Sanitária no Alimentár (AIFAESA) atu haree hodi kontrola supermerkadu sira hodi identifika na’an lata ne’ebé importa husi nasaun ne’ebé de’it .

Iha fatin hanesan, Diretór Operasaun AIFAESA, Gabriel da Costa, konsidera enkontru ne’e importante tanba liuhosi meiu ne’e, ekipa téknika MAP nian atu fó hanoin ba malu hodi haree atu nesesáriu saida maka presiza foti.

“Ita presiza halo inspesaun ba supermerkadu sira atu haree no identifika, AIFAESA sei halo ida ne’e no sei halo teste ba ai-han sira iha laboratóriu hodi identifika ai-han saida maka ita bele konsumu”, dehan nia.

Kuandu ai-han sira iha supermerkadu maka rezultadu teste laboratóriu identifika la di’ak, AIFAESA sei elimina, tanba rezultadu teste moras fahi iha ona no hamutuk ho MAP iha ekipa taskforce atu haree ida ne’e.

“Ita presiza halo kontrolu ba na’an fahi iha lata, ne’ebé sirkula iha supermerkadu tanba kauza moras ASF rasik afeta maka’as ona ba ita nian rai. Importante maka Alfándega ho Kuarentena maka labele fó tama”, afirma.

Nune’e mós, Xefe Departamentu Kuarentena Animais, Izaldes Santana, salienta durante ne’e serbisu ho rigór, tanba sasán importadu mai ho sertifikadu husi nasaun esportadór sira, kuandu sira laiha sertifikadu esportasaun, Kuarentena Timor-Leste nian haruka fila.

Kona-ba moras ASF rasik, Izaldes Santana, re afirma sei serbisu maka’as hodi kontrola hahán importadu sira.

Notísia relevante : MAP Identifika Fahi Mate Tanba Kauza Husi Moras ASF

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here