Tasa Tolu husi Jogu Liga Futeból Amadora (LFA) époka 2019, ne’ebé Lalenok United FC hetan tutuir malu. Imajen/Hortençio Sanchez

GLENO, 19 outubru 2019 (TATOLI) – Prezidente Klube Lalenok United FC, Pedro Belo, hateten kampiaun ba títulu tolu ne’ebé Lalenok hetan iha fulan-neen nia laran tanba preparasaun di’ak no esforsu-aan maka’as.

“Lalenok antes kampiaun liu ona hosi prosesu difísil tebes, tanba antes hahú liga ami prepara ona. Hahú hosi fulan-outubru tinan kotuk ami prepara ona tanba ne’e maka ami sai kampiaun tanba iha preparasaun di’iak” tenik Pedro ba Agência Tatoli, sábadu ne’e.

Notísia Relevante: Lalenok Sai Kampiaun Super Tasa 2019

Nia dehan, klube ne’ebé de’it bainhira hakarak sai kampiaun, tenke halo preparasaun di’ak no jogadór mós tenke badinas treinu no disiplina.

Pedro Belo subliña, ho rezultadu ne’ebé ekipa Lalenok hetan iha jogu Super Tasa 2019, sira sei la kontenti de’it ho títulu tolu ne’ebé hetan ona maibé kontinua prepara-aan maka’as atu nune’e bele mantein nafatin iha tinan oin.

Biban ne’e, nia agradese ba Treinadór Lalenok, Yance Matmei, ne’ebé lori ona Lalenok ba susesu iha époka 2019, nune’e mós agradese ba jogadór hotu ne’ebé hatudu ona jogu bonitu hodi harame ona eventu futeból nasionál iha Timor-Leste.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here