Ekipa Lalenok United FC hasai imajen hamutuk, hafoin sai Kampiaun iha Super Tasa 2019, iha jogu ikus Liga Futeból Amadora (LFA) époka 2019 ne’ebé realiza iha sábadu (19/10), iha Estádiu Café Ermera. Imajen/Hortençio Sanchez

GLENO, 19 outubru 2019 (TATOLI) – Estádiu Café Ermera sai sasin ba klube estimadu, Lalenok United FC ne’ebé maka sai kampiaun hafoin halakon ninia adversáriu, AD SLB alias Makikit Laulara ho rezultadu 3-1, iha jogu ikus Liga Futeból Amadora (LFA) époka 2019, hanaran Super Tasa.

Golu Lalenok nian hirak ne’e prodúz hosi Yohanes Gusmão iha minutu 16, 28 no Santiago da Costa iha minutu 54, enkuantu golu úniku SLB marka hosi Job Mark Freitas iha minutu 62.

Nune’e, husi vitória ne’e hatudu ba adeptu futeból sira katak Lalenok sai ona hanesan ekipa zigante maski foin mosu iha tinan 2016, hahú hosi divizaun datoluk hafoin hakat ba divizaun daruak no sa’e ba divizaun dahuluk hodi sai kampiaun ba tasa tolu iha tinan-ida nia laran.

Tasa Tolu husi Jogu Liga Futeból Amadora (LFA) époka 2019, ne’ebé Lalenok United FC hetan tutuir malu. Imajen/Hortençio Sanchez

Haree ba prestasaun ne’ebé ekipa futeból ne’e hetan, Treinadór Lalenok, Yance Matmei, espresa ninia sentimentu ho rezultadu  ne’ebé ninia ekipa hetan, maibé nia parte rekoñese la fásil tanba atu hetan rezultadu di’ak tenke liuhosi prosesu naruk no dezafíu oioin, nune’e mós ezije disiplina hodi bele halo klube ne’e sai kampiaun tutuir malu.

“La’ós fásil tanba iha Timor-Leste maka bele akontese hanesan ne’e. Manán tasa tolu iha tinan-ida nia laran. Ha’u kontente maibé buat hotu iha tanba esforsu ne’ebé ita halo no tulun hosi Maromak”, tenik Yance.

Nia hatutan, “Ha’u-nia mehi maka ami tenke ra’ut hotu títulu tolu ne’e. Ohin ami ra’ut duni. Agradese tebes ba jogadór sira hotu nia kolaborasaun maka halo ami bele serbisu maka’as hodi atinje rezultadu ne’e”.

Nia rasik la espera tinan-oin bele sai tan nune’e, maibé nia sei esforsu-aan hodi fó treinamentu ba jogadór sira hodi sai di’ak liután atu mantein nafatin pozisaun sai kampiaun.

Entretantu, hosi kampiaun ne’e Lalenok hetan tasa ida no osan hamutuk $15.000.

Jogu refere dirije hosi árbitru, Pedro Carvalho, Juíz Liña, António Carvalho no Filomeno Pereira, enkuantu árbitru rezerva maka, Francisco Pereira.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here