Autoridade Nasionál ba Espozisaun Dubai , Francisco Kalbuadi Lay. Imajen/Tatoli.

DILI, 12 setembru 2019 (TATOLI) – Eis Ministru Turizmu, Arte no Kultura, Francisco Kalbuadi Lay, agradese Oitavu Governu Konstitusionál ne’ebé lidera husi Primeiru-Ministru, Taur Matan Ruak, nomea sai nu’udar autoridade nasionál ba espozisaun Dubai 2020.

“Ha’u agradese ba Oitavu Governu liuhusi Primeiru-Ministru, Taur Matan Ruak, ne’ebé lidera konsellu Ministru fó fiar no knaar mai ha’u atu sai hanesan autoridade hodi jere hela expo Dubai ne’e hamutuk ho komisaun interministeriál, husu boot apoia ba sidadaun hotu atu ami bele hala’o ami nia knaar ho di’ak”, Autoridade Nasionál Expo Dubai afirma liuhusi konferénsia imprensa iha edifísiu Ministériu Turizmu, ohin.

Autoridade Nasionál ba Espozisaun Dubai , Francisco Kalbuadi Lay. Imajen/Tatoli.

Kalbuady Lay friza prontu atu organiza komisaun interministeriál hodi lori Timor-Leste (TL) ba partisipa espozisaun Dubai 2020.

“Iha tinan 2020 ne’e ita prontu atu partisipa iha espozisaun iha Dubai tanba komisaun organizadora mós oferese ona pavilion ho metru 400 ba ita ho free”, Kalbuady kompromete.

Partisipasaun Timor-Leste nian iha Expo Dubai, nia dehan Komisaun Organizadór konfirma no autoriza ona atu Timor-Leste bele lori artezanatu sira ba fa’an.

“Sei fó oportunidade ba ita-nia kbiit-laek sira iha Maubara no Likisá no munisípiu seluk ne’ebé ami halo ona kontratu ho fundasaun sira liuliu iha ita-nia artezanatu hanesan tais, lafatik no seluk tan atu ami bele lori sira ba promove iha Dubai”, katak.

Kalbuady adianta katak Timor Leste konfirmandu sei tuir festivál kulináriu atu fó oportunidade promove mós produtu lokál iha Dubai.

Tuir nia, oportunidade boot atu promove kultura, kria mós kontaktu entre setór privadu sira liuliu iha setór ekonómiku, setór turizmu, indústria, komérsiu, kapasita rekursu umanu Timor-Leste aprende atividade no eventu oioin iha expo Dubai.

“Iha tema importante mós ita sei ko’alia mak pás ne’e, ita sei konvida mós ita-nia na’i-ulun sira ka maun-boot atu ba ko’alia kona-ba pás liuliu kontribuisaun Estadu Timor-Leste ba pás iha mundu no ko’alia mós meiu ambiente”, akresenta.

Daudaun ne’e Kalbuady salienta kontinua diskusaun ho komisaun interministeriál liuhosi pontu vokál. “Para ami tuur hamutuk haree partisipasaun ita-nia másima iha expo Dubai mezmu ho kontribuisaun ki’ik, maibé promove Timor-Leste ba mundu”.

Nasaun kuaze 192 mak preparadu ona atu partisipa expo Dubai 2020 ho previzaun kuaze vizitante millaun 25.

Nia dehan, iha novembru tinan ne’e sei iha Assembleia Jerál iha Dubai ne’ebé envolve mundu tomak atu deside ba atividade saida de’it mak sei envolve iha ne’ebá no kada nasaun sei konfirma atividade saida de’it mak sei halo.

Kona-ba orsamentu ba, nia dehan sei iha diskusaun laran tanba presiza define didi’ak atividade hirak mak Timor-Leste sei aprezenta no hafoin autorizasaun husi Komisaun Organizadora expo Dubai 2020.

Espozisaun mundiál ne’e sei selebra iha Dubai Uni Emirat Arab, hahú iha loron 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.

Notísia relevante : Nomea Ba Autoridade Espozisaun Dubai, Francisco Kalbuadi Agradese Konfiansa Governu

Timor-Leste sei Promove Identidade Soberania Iha Expo Dubai

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here