ATSABE, 18 outubru 2019 (TATOLI) – Populasaun suku Batumanu, postu administrativu Atsabe, Munisípiu Ermera, ne’ebé akumula aldeia haat hanesan Batumanu, Batuero, Motubau, no Batú ho totál populasaun 1.308, difisil asesu ba estrada, liuliu iha tempu udan.
Xefe Suku Batumanu, Fernando Soares, informa atubele asesu bá estrada munisipál, abitante sira la’o durante kilo neen.
“Estrada ne’e kondisaun difisil tebes tanba rai kahur ho fatuk mesak boboot de’it, no rai kle’an ne’ebé difikulta atu halo movimentu bá-mai ho transporte”, hateten Xefe Suku Batumanu ba Tatoli, ohin.
Maske nune’e, autoridade ne’e dehan, nu’udar líder lokál asina ona proposta hosi kompañia sira atu halo estrada, maibé to’o agora seidauk realiza.
Xefe Suku afirma, kondisaun estrada ladi’ak difikulta komunidade atu transporta sira-nia produtu bá merkadu.
“Área ne’ebé konsidera hanesan setór agrikultura luan liu maka iha aldeia Batumanu, maibé tanba laiha irrigasaun hodi transporta bee no aldeia sira seluk ke’e de’it bee hanesan bee-dalan maka tama bá sira-nia to’os. Maibé tanba ke’e de’it ho liman entaun volume bee la maka’as”, esplika Xefe Suku ne’e.
Nia salienta produtu ne’ebé komunidade sira kuda maka hanesan batar, fore-talin, fehuk no produtu lokál oioin.
Notísia relevante : Naroman ba Suku Lori Governu Hakbesik Liután ba Povu
Jornalista : Antonia Gusmão
Editora : Maria Auxiliadora
