Komunidade simu Sekretáriu Estadu Komunikasaun Sosiál, Merício Akara, bainhira sosializa programa “Naroman Ba Suku” iha área rurál. Imajen Mídia SEKOMS

ATSABE, 18 outubru 2019 (TATOLI) – Xefe Suku Batumanu, postu administrativu Atsabe, Munisípiu Ermera, Fernando Soares, kontente tebes ho Programa Naroman ba Suku tanba lori programa Governu nian hakbesik liután ba povu.

Tuir Autoridade lokál ne’e katak, durante ukun-aan iha sira-nia suku foin dahuluk realiza atividade Governu nian.

“Ha’u nu’udar autoridade lokál sente kontente tebes tanba programa ne’e iha asuntu importante hanesan Governu hakbesik ba povu, atu kria biblioteka iha suku ne’e, no sei fó formasaun ba juventude sira. Tanba aban bainrua ita-nia dezenvolvimentu bá oin ita rasik maka tenke serbisu ba ita-nia rain rasik”, hateten autoridade lokál ne’e ba Tatoli iha suku Batumanu, ohin.

Líder komunitáriu ne’e iha esperansa boot tebes ba Programa Naroman ba Suku hodi fó benefísiu ba povu liuliu povu Batumanu.

“Ha’u espera programa ne’ebé realiza hosi Sekretáriu Estadu Komunikasaun Sosiál sei fó benefísiu ba ha’u no ha’u-nia povu tomak”, dehan Fernando Soares.

Maske nune’e, nia dehan, partisipasaun abitante nian menus tanba sei dúvida ho atividade refere.

“Tanba ha’u haree ema hotu atu partisipa programa Governu nian haree hotu ba osan tanba abitua ho projetu dólar tolu. Tanba ami-nia xefe aldeia sira mobiliza sira dehan Governu mai ne’e osan de’it, no inisiativa rasik hosi komunidade menus maibé ami koko esplika benefísiu hosi programa ne’e ba sira ne’ebé sira balu kompriende ona no balu maka seidauk”, haktuir Fernando.

Suku Batumanu akumula aldeia haat hanesan Batumanu, Batuero, Motubau, Batú ho totál populasaun 1.308.

Sekretáriu Estadu Komunikasaun Sosiál nia Programa Naroman ba Suku , ohin, lansa tan iha suku refere. Antes ne’e, lansa ona iha suku Rotutu, postu administrativu Same Vila, Munisípiu Manufahi no suku Liurai, postu administrativu Aileu Vila, Munisípiu Aileu.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here