Komandante PNTL Munisípiu Bobonaro, Superintendente Xefe, Octávio de Araújo Bucar. Imajen/Antonio Goncalves

DILI, 18 outubru 2019 (TATOLI)-Atu reforsa servisu Polisia Nasional Timor-Leste (PNTL) hodi prevene no redús númeru krime iha komunidade nia leet, Komandu Polisia Munisípiu Bobonaro,  iha loron 30 outubru ne’e, sei fó posse ba membru Konsellu Polisiamentu Komunitária (KPK) purvolta ema na’in 400  iha Suku 18,  Postu Administrativu Bobonaro, Munisípiu Bobonaro.

Notísia Relevante : Laiha Rádiu ho Karreta Difikulta Operasaun PNTL Bobonaro

Suku 18 ne’e kompostu husi Suku Aiasa, Atuaben, Boboanro,Karaubau, Kolimau, Kotaboot, Ilat-Laun, Leber, Lour, Lourba, Malilait, Maliubu, Molop, Oeleu, Sibuni, Soilesu, Tapo no Tebabui.

Komandante PNTL Bobonaro, Superintendente Xefe Polisia, Octávio de Araújo Bucar, informa, ohin, informa ba Ajénsia TATOLI, via telefone katak membru KPK sira ne’e hetan ona formasaun oinsá atu apoiu Polisia hodi asegura seguransa iha komunidade nia leet.

“Sertifikadu ne’ebé ha’u asina ona 300-resin, maibé másimu ema 400,” dehan, Superintendente Xefe Polisia, Octávio de Araújo Bucar.

Bobonaro iha Postu Administrativu neen (6) ho totál Suku 50, Aldeia 193, uma kain 22.918 ho abitante 111.006  tuir monografia Munisípiu iha 2015.

Husi total suku 50 ne’e falta de’it suku hitu iha postu Administrativu Lolotoe maka PNTL munisípiu seidauk estabelese KPK. Enkuantu suku 43 husi Postu Administrativu Atabae, Balibo, Cailaco, Maliana, estabelese ona durante mandatu eis Komandante Superintendente Xefe Armando Monteiro.

Ba Postu Administrativu Lolotoe, tuir komandante ne’e katak, sei estabelese depois posse ba membru KPK husi Postu Administrativu Bobonaro.

Nia garante ho aumenta númeru KPK iha suku sira sei apoiu tebes polisia atu asegura seguransa liuliu prevensaun konflitu iha komunidade nia leet. Tanba estrutura KPK  ne’ebé estabelese iha suku kompostu husi Xefe Suku rasik, xefe Aldeia, joven no seluk tan.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here