Komandante Operasaun Nasionál, Polísia Nasionál Timor-Leste, Superintendente Xefe, Pedro Belo, halo konfernesia imprensa kona-ba Operasaun Konjunta ne'ebé prende atributu grupu ilegá iha fronteira Batugade, kinta (17/10/2019). Imajen/Eujénio Pereira

DILI, 18 Outubru 2019 (TATOLI)-Autoridade defeza no seguransa, liuhusi operasaun konjunta Polisia Nasional Timor-Leste (PNTL) Unidade Polisia Fronteira ho FALINTIL-Forsa Defeza Timor-Leste (F-FDTL) no Serbisu Alfándega apreende atributu grupu ilegál balun nian ne’ebé iha relasaun ho arte-marsiál.

Notísia Relevante : PNTL Bobonaro Kaptura Membru Grupu Ilegál 300-resin

Atributu grupu arte-marsiál ne’ebé Estadu bandu liuhosi Dekretu Governu ne’e apreende iha Postu Integradu Alfándega Batudege iha loron 17 outubru, tuku 14:00  Otl, ne’ebé tula hosi Kupaun-Indonézia mai Timor-Leste liuhosi sasán pakote karreta Travel Parasidise.

Sasán sira ne’ebé apreende hanesan, farda kalsa no kamiza hamutuk 53, kamiza 23 no kartaun 29.

Komandante Operasaun Nasionál, Polísia Nasionál Timor-Leste, Superintendente Xefe, Pedro Belo, informa, bainhira ekipa halo identifikasaun ba sasán ne’ebé haruka hosi Indonézia mai Timor-Leste ninia enderesu la tau kompletu inklui sasán ne’e atu haruka ba se mós la deskreve klaru, maibé hakerek de’it naran pakote sasán no númeru inisiál ema nian.

“Ekipa prende farda grupu ilegál hamutuk 53, kaos 23 no sintu boot no sintu ki’ik no kartaun identidade ho fotografia no naran kompletu hamutuk 29,” informa Pedro Belo, ohin, ba jornalista iha Komandu PNTL, Caicoli, Dili.

Ho evidénsia sira ne’e, PNTL halo ona identifikasaun ba naran kartaun sira ne’e hodi deside halo operasaun koordenada buka tuir suspeitu sira ne’ebé halo ligasaun treinu ilegál iha área Indonézia nian.

“Evidénsia no kartaun sira ne’e hatudu momoos katak, eis organizasaun arte-marsiál refere iha ligasaun metin ho Indonézia, tanba uza sigla Bandeira Merah Putih iha kartaun membru. Modus ne’ebé sira uza, modus krime organizadu nian,” afirma Pedro Belo.

Tuir lei Nu. 5/2017 rejime jurídiku pratika Arte Marsiál, Rituais, Armas Branka, Rama Ambon no alterasaun kódigu Penál hatuir katak, sasán sira ne’ebé grupu uza nu’udar krime organizadu nian.

Tuir planu, Komandu PNTL sei haluan nia operasaun vijilánsia metin liután iha liña fronteira rai no tasi. Tanba atividade grupu ilegál ne’e bele estraga estabilidade nasionál.

Hahú ohin ba oin, Komandu PNTL Munisipiu Bobonaro, Superintendente Xefe, Oscatavio de Araújo Bucar sei aprezenta evidénsia ne’e ba Ministériu Públiku  hodi prosesa tuir lei.

“Kartaun sira ne’e ema nia naran no fotografia mós kompletu, ne’ebé fasil para ita buka tuir ema sira ne’e balun iha Dili no balun iha munisipiu,” hateten Pedro Belo.

Komandante Pedro mós husu ba Órgaun Judisiáriu ne’ebé servisu independente no imparsiál, atu haree evidénsia sira ne’e prosesu tuir lei, tanba tempu besik PNTL sei kaptura autór sira ne’ebé naran identifika iha kartaun  laran no uza atributu bandeira rai seluk hodi kontra lei.

Atributu ne’ebé prende, tuir Pedro Belo, nu’udar flagrante delitu, no husu atu Tribunál konsidera prosesu tomak ne’ebé PNTL rekolla, nune’e Tribunál bele konsidera iha ninia desizaun ikus ba prosesu tuir lei hodi bele salva nasaun nia vida la’o iha pás.

Jornalista : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here