Komunidade okupa livremente Lagoa Tasi Tolu hodi harii uma. Imajen/Osória A. Marques

DILI, 17 outubru 2019 (TATOLI) – Sekretáriu Estadu Terras no Propriedade (SETP), Mario Ximenes, informa,  sesta aban (18/10/2019),  sei hasai okupante sira ne’ebé mak hela iha Tasi Tolu, liuliu sira ne’ebé mak okupa rai estadu hodi halo uma iha tasi ninin no foho lolon.

Notísia Relevante : Komunidade Okupa Livremente Lagoa Tasi Tolu

Sekretáriu Estadu Terra no Propriedade (SETP), Mário Ximenes.

Governu hola medida ne’e tanba okupante sira utiliza zona protejidu hodi harii uma no kontribui ba estraga ambiente iha Lagoa Tasi Tolu no nia paizajen, inklui estraga imajen fatin turístiku istóriku.

“Iha semana rua liu ba SETP hamutuk ho ekipa téknika inklui mós husi seguransa hanesan polisia  fó ona tempu ba sira semana rua atu sira sai husi Tasi Tolu, semana ida ekipa SETP, Ministériu Obras Públikas no Polisia iha  ona preparasaun mak, sesta aban, sei hasai sira iha Tasi Tolu,”  informa Mario Ximenes, ba ajénsia  TATOLI  iha edifísiu SETP, Mandarin, Dili, kuarta (16/10/2019).

SETP, MOP hamutuk ho seguransa sei sobu uluk komunidade ne’ebé mak hela iha foho lolon no hirak ne’ebé mak konstrui uma iha lagoa ibun Tasi tolu nian. Tanba sira nia prezensa ilegálmente.

Nia dehan, SETP sei la hasai komunidade ne’ebé rejistadu ona husi Sentru Nasional Kadastru (SNC-sigla portugés), maibé ba hirak ne’ebé mak la rejista no halo uma tuir hakarak de’it mak ekipa SETP identifika hotu atu sobu no hasai sira hotu.

Ekipa SETP kontinua halo observasaun iha terrenu, liu-liu iha Tasi Tolu ba total uma kain 3.800 ne’ebé rejistadu ona husi SNC, maibé sira ne’ebé mak hakarak halo fali uma sein iha koñesimentu no la rejistadu mak sei hasai sira.

 Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here