Ministru Agrikultura no Peska, Joaquim José Gusmão dos Reis Martins.

DILI, 16 outubru 2016 (TATOLI) – Primeiru-Ministru (PM), Taur Matan Ruak, orienta Ministériu Agrikultura no Peska (MAP) atu prepara dadus ka relatóriu ba plantasaun kafé ne’ebé hetan estragu tanba inséndiu iha Ermera no Likisá.

“Ohin, iha Konsellu Ministru, Primeiru-Ministru orienta katak tenke prepara ona relatóriu ba plantasaun kafé sira ne’ebé hetan estragu hodi tau hamutuk ho relatóriu husi ministériu sira seluk atu entrega ba Ministériu Administrasaun Estatál (MAE) atu Governu halo planu integradu ba halo intervensaun diretamente ba plantasaun kafé”, Ministru Agrikultura no Peska, Joaquim José Gusmão dos Reis Martins, iha Palasiu Governu, ohin.

Ministru Joaquim afirma hafoin inséndiu foin lalais ne’e, MAP liuhosi Diresaun Jerál Floresta no Diresaun Jerál Indústria ba Planta Kafé hamutuk ho ekipa Sekretáriu Estadu Ambiente (SEA) hala’o avaliasaun hodi halo identifikasaun ba ai-horis liuliu kafé ektare hira mak hetan estragu.

“Daudaun, ami-nia ekipa hala’o hela faze elaborasaun relatóriu ne’ebé finaliza hotu mak ita foin hatene kafé ektare, ai-horis no toos hira mak hetan estragu hodi hala’o intervensaun”, katak.

Liña ministériál ne’ebé foti dadus kredivel ba inséndiu ne’e hanesan, Sekertáriu Estadu Protesaun Sívil (SEPS), MAE, SEA no MAP hodi tau hamutuk hodi Governu hala’o intervensaun no apoia abitante afeitada sira.
“Ami foku liu ba plantasaun kafé, ai-horis no to’os ne’ebé fó benefísiu ba ita-nia povu, maibé hetan ona estragu husi inséndiu ne’e, liuliuiha Munisípiu Ermera no Likisá”, dehan ministru.

Inséndiu ne’e akontese iha tuku 09:00 OTL, iha Munisípiu Ermera no Likisá iha kuarta (2/10), rezulta kuaze uma 200-resin mak ahi-han. Enkuantu SEPS mós distribui ona apoiu emerjénsia ba vítima inséndiu balun.

Notísia relevante : Governu Distribui Apoiu ba Vítima Inséndiu iha Liquiça ho Ermera

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here