Sarani kuaze atus rua resin partisipa misa hodi komemora trajédia Balibo Five. Imajen TATOLI/ Evaristo Soares Martins

BALIBO, 16 outubru 2019 (TATOLI)–Jornalista internasionál na’in-lima ne’ebé mate iha 16 outubru 1975, hamriik iha lialoos hodi divulga informasaun kona-ba situasaun polítika iha Timor ba mundu.

“Hanesan ita-nia jornalista na’in-lima mate oho hosi militár Indonézia iha 1975, kada loron jornalista sira hasoru problema no mate iha mundu tanba sira hamriik iha lialoos”, Vigáriu Parókia Balibo, Padre Arun Ekka SVD no akompañadu hosi Padre Parókia, Stanislaus Kopong, bainhira dirije misa hodi komemora trajédia oho jornalista estranjeiru na’in-lima ba dala-44, iha Postu Administrativu Balibo, Munisípiu Bobonaro, ohin.

Iha omília, Padre Arun Eka, dehan esperiénsia terus no mate iha kruz, hanesan mós ema terus no oho iha mundu.

Lee mós: Jornalista Na’in-lima Hola Parte iha Istória

Tuir nia katak mate mak etapa ikus hakotu peregrinasaun hosi mundu.

Padre husu sarani hotu estima paisajen pasadu no esperansa ba futuru, moris dame iha prezente.

“Ba ita-nia jornalista na’in-lima mai Timor-Leste ho objetivu di’ak maibé sira hasoru trajédia no mate, fakar sira-nia raan iha rai Timor-Leste, liuliu iha Balibo. Ita reza ba sira bele moris haksolok tinan ba tinan iha reinu Lalehan”, esplika Padre Arun Eka.

Komemorasaun trajédia oho jornalista na’in-lima ne’e organiza hosi Konsellu Imprensa Timor-Leste serbisu hamutuk ho Timor-Leste Press Union (TLPU) no Asosiasaun Jornalista Timor Lorosa’e (AJTL).

Iha komemorasaun ne’e, hala’o atividade oioin hanesan atividade reflesaun, misa, lansamentu ba Balibo Trails Tour, jogu amizade no kari ai-funan ba fatin ne’ebé militár Indonézia sunu jornalista na’in-lima ne’e.

 Misa ne’e partisipa hosi Prezidente Konsellu Imprensa, Virgílio Guterres, Komisáriu José Ximenes, estrutura Konsellu Imprensa balun no sarani kuaze atus rua resin.

Hafoin misa ramata, Prezidente Konsellu Imprensa Timor-Leste, Virgílio Guterres, husu jornalista sira atu banati São Tomé.

“Jornalista sira tenke husu, husu no husu beibeik hanesan São Tomé ne’ebé husu esplikasaun klaru ba Nai Jesus, nune’e bele intende didi’ak ba asuntu ida”, nia katak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here