Sekretáriu Estadu Komunikasaun Sosiál, Merício Juvenal dos Reis Akara. Imajen António Goncalves

BALIBO, 15 outubru 2019 (TATOLI)–Jornalista na’in-lima ne’ebé mate no ohin loron koñesidu ho Balibo Five, hola parte iha istória Timor-Leste nian iha prosesu funu naruk ida-ne’e.

Jornalista na’in-lima ne’e mak hanesan Greg Shackleton, Tony Stewart, Brian Peters, Malcolm Rennie no Garrry Cunningham.

Tan ne’e, Sekretáriu Estadu Komunikasaun Sosiál, Merício Akara, apresia ho jornalista na’in-lima ne’ebé mate iha Balibo.

“ita apresia ho sira-nia sakrifísiu. Sira hola parte iha istória funu ida-ne’e”, diskursu Merício Akara iha ámbitu Komemorasaun Tinan-44 Trajédia Balibo Five, iha Postu Administrativu Balibo, tersa ne’e.

Lee mós: Jornalista Na’in-lima Mate Halo Mundu Hatene Timor iha Problema

Governante ne’e mós apresia família jornalista na’in-lima ne’ebé durante ne’e apoia komunidade Balibo hodi harii Balibo Trail Tours.

Tanba ne’e, tuir nia, merese selebra duni jornalista na’in-lima ne’ebé mate iha 1975.

Nia dehan, iha tempu funu la’ós de’it membru militár mak alvu maibé jornalista mós sai alvu.

“Tanba ne’e mak jornalista barak lakon sira-nia vida, hanesan mós militár. Jornalista sira mós hetan risku boot iha funu, liliu hetan torturasaun iha funu”, hateten Merício Akara.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here