Uma ne'e mak militár Indonézia oho jornalista estranjeiru na'in-lima iha laran, tinan 1975, iha Balibo. Imajen Teotónio Alves

BALIBO, 15 outubru 2019 (TATOLI)–Jornalista internasionál na’in-lima nia mate iha Balibo halo mundu hatene Timor iha problema.

Jornalista na’in-lima ne’ebé mate tanba oho hosi militár invazór Indonézia iha Balibo iha 1975 mak hanesan Greg Shackleton, Tony Stewart, Brian Peters, Malcolm Rennie no Garry Cunningham.

“Ne’e hanesan loron istóriku ida-ne’ebé importante, tanba ho jornalista na’in-lima mate halo mundu koñese no hatene Timor iha problema. Tanba ne’e, Estadu Timor-Leste merese fó omenajen ba sira na’in-lima”, dehan Administradór Postu Administrativu Balibo, Rosário Gonçalves ba Agência TATOLI, iha Postu Administrativu Balibo, Munisípiu Bobonaro, tersa ne’e.

Nia husu ba Governu liuhusi Sekretaria Estadu Komunikasaun Sosiál no Konsellu Imprensa selebra nafatin loron istóriku ida-ne’e.

Entretantu, nia rekoñese, rekolla informasaun iha tempu funu ne’e difísil.

“Ha’u la’ós jornalista maibé ha’u sente katak jornalista nia serbisu iha funu ne’e difísil. Tanba ne’e, ita hotu hakruuk ba sira na’in-lima tanba momentu ne’ebé difísil konsege espalla ona informasaun ba mundu”, nia haktuir.

Nia fó sai katak, aban (16/10), Embaixadór Austrália sei inaugura Uma Balibo Trails hodi sai hanesan sentru informasaun turístika, sentru istória bainhira ema ruma vizita Balibo.

Partisipa iha selebrasaun Balibo Five ba dala-44 iha tinan ida-ne’e mak Sekretáriu Estadu Komunikasaun Sosiál, Merício Akara, Prezidente Konsellu Imprensa, Virgílio Guterres, Prezidente Agência TATOLI, José da Costa, estudante no jornalista timoroan sira.

Komemorasaun trajédia Balibo Five ba dala-44 ho tema “Jornalizmu Livre atu Asegura Direitu Umanu”.

Programa ne’e realiza tanba organiza hosi Konsellu Imprensa no halo kolaborasaun serbisu ho Timor-Leste Press Union (TLPU) no Asosiasaun Jornalista Timor-Leste (AJTL).

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here