Ministru Reforma Lejizlativa no Asuntu Parlamentares, Fidelis Manuel Leite Magalhães. Imajen/Egas Cristovão

DILI, 14 outubru 2019 (TATOLI) – Ministru Koordenadór Asuntu Ekonómiku (MKAE) interinu, Fidelis Manuel Leite Magalhães orgullu tebes ho kriasaun ba eskema garantia kréditu ne’ebé lidera hosi Banku Sentrál Timor-Leste (BCTL, sigla portugés).

Maski nune’e MKAE interinu ne’e dehan, úniku Banku Nasionál Komérsiu Timor-Leste (BNCTL, sigla portugés) ne’ebé hanesan banku TL nian maka partisipa.

“Estabelesimentu eskema garantia kréditu ne’e importante tebes, ne’e ideia ida furak. Ne’e hanesan projetu pilotu, iha orsamentu rihun $4 ne’e hanesan baze inisiál, más to’o agora banku ida ne’ebé mak hola parte BNCTL no banku sira seluk lae tanba ha’u rona informasaun katak sira nia lei inan la permite”, hateten Fidelis Manuel Leite Magalhães bainhira halo intervensaun iha serimónia kompetisaun Planu Negósiu Inovativu 2019 ne’ebé realiza hosi IADE iha Timor Plaza, ohin.

Atuál Ministru Reforma Lejizlativa no Asuntu Parlamentár (MRLAP) ne’e hatutan, hanesan Governu ida pro liberalizasaun, pro kompetisaun, maibé situasaun ida hanesan estabelesimentu eskema garantia kréditu só BNCTL hanesan Banku Timor-Leste nian de’it maka partisipa no sira seluk la partisipa ho razaun oioin entaun tenke haree problema no dezafiu iha setór finanseiru maka saida.

“Tanba sá maka ha’u dehan eskema garantia kréditu ne’e furak tebes tanba Governu fahe tiha risku ho indivíduu ne’ebé foti osan ne’e liuhosi Banku Sentrál ajuda partilla risku ne’e”, dehan governante ne’e.

Eis deputadu ne’e afirma, BNCTL mós daudaun halo hela esforsu atu hadi’a sira-nia produtu, atendimentu, sistema hodi garante ba kliente sira hodi asesu ba iha banku online hodi asesu ba eksema hanesan kréditu ka sistema garantia kréditu bele uza iha rai sira seluk.

Eskema Garantia Kréditu ne’e aprova ona husi Governu Konstitusionál Daneen, ho prevee millaun U$4 liuhusi Orsamentu Jerál Estadu (OJE) 2017.

Nune’e iha jullu 2019, Banku Sentrál Timor-Leste (BSTL) lansa ona Sistema Garantia Kréditu ba empreza ki’ik no média no prontu ona atu simu pedidu kandidatu ba kréditu ne’e.

Programa ne’e jere husi BSTL no implementa husi instituisaun kréditu iha Timor-Leste no daudaun ne’e só BNCTL mak partisipa hanesan kredór (fó kréditu).

Governadór BSTL, Abraão de Vasconcelos, iha lansamentu foin lalais ne’e, fó sai katak Sistema Garantia Kréditu agora operasionál totalmente.

“Banku Sentrál dezenvolve ona sistema online ne’ebé prosesu hotu dijitalizadu”, katak.

Programa Sistema Garantia Kréditu ne’e atu promove empreza ki’ik no média iha Timor-Leste ho fasilita sira ba asesu finanseira.

Iha programa ne’e, risku kréditu iha empréstimu ba empreza ki’ik no média sei fahe entre fó empréstimu no Sistema Garantia.

Iha faze inísiu, programa Garantia Kréditu sei fó benefísiu ba empreza ki’ik no média, ho rejistu empregadu husi 6 to’o 50, na’in ema timoroan, ne’ebé opera iha área agrikultura, turizmu, indústria manufatureira no transporte.

Aléinde ne’e, kréditu só ba projetu ekonomia viavel ne’ebé prienxe ba Sistema Garantia Kréditu. Empreza ki’ik no média ne’ebé interese hodi kandidata-aan ba sistema ne’e kontaktu ho BNCTL no fó pedidu ba empréstimu. BNCTL sei halo avaliasaun kréditu, no solisita garantia ba BSTL.

Antes ne’e Prezidente BNCTL, Brígido de Sousa, deklara ona katak BNCTL mak banku dahuluk ne’ebé hakarak partisipa iha Sistema Garantia Kréditu ne’e.

Brígido dehan, daudaun ne’e iha ona empreza balu maka hatama proposta hodi aplika ba eskema garantia kréditu.

Notísia relevante : Ema Ne’ebé Asesu ba Sistema Garantia Kréditu Tenke 100 % Timoroan

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here