José Texeira, Advogadu China Harbour Timor,Lda. Foto espesiál.

DILI, 14 outubru 2019 (TATOLI) – Advogadu Kompañia China Harbour Timor Lda, José Teixeira, hateten Kompañia China Harbour hatán ona dokumentu inisiál hodi kontra faktu sira ne’ebé Diretór Kompañia Marino Enterprise, Edencio Soares alega.

Sim, China Harbour Timor Lda, hanesan parte rekeridu iha prosesu NUC 209/19 iha TDD (Tribunál Distritál Dili), hatama ona nia opozisaun ba providénsia kautelar iha 23 Setembru 2019. Iha Loron 16 setembru 2019, Governu nu’udar reprezentante Estadu mós hatama embargo de terceiro kontra rekeridu señór Edencio Soares”, Advogadu José Teixeira afirma ba Tatoli via mídia sosiál, ohin.

José Texeira friza, daudaun hein hela Tribunál atu notifika hodi hala’o audiénsia atu rona sasin ne’ebé China Harbour aprezenta iha opozisaun ba providência cautelar de restituição provisória de posse.

Lee mós : Providénsia Kautelar Atu Hapara Provizóriu Atividade Ruma Iha Disputa Laran

“Ami hein tribunál atu hatán. Tuir kódigu prosesu Sivíl ami hein agora Tribunál atu notifika kona-ba audiénsia atu rona ami-nia sasin sira”, katak

Hatán ba sasin na’in hira mak China Harbour aprezenta, Advogadu José Texeira dehan : “Ami-nia kliente arrola testemuña na’in-lima iha ami-nia kliente nia opozisaun, ba kestaun seluk ha’u labele fó komentáriu ona, prosesu sei la’o iha Tribunál”, haktuir.

Antes ne’e, Diretór Kompañia China Harbour Timor, Lda, Wang Wei, husu ba Tribunál atu extende tempu ne’ebé fó ba kompañia atu hatán ba alegasaun hosi diretór kompañia Marino Enterprise, Lda, Edencio Soares.

Karta ne’ebé emite husi Tribunál Distritál Dili (TDD), iha loron 3 setembru 2019, haktuir Wang Wei iha tempu durante loron 10 nia laran atu entrega petisaun ka dokumentu inisiál hodi kontra faktu sira ne’ebé Edencio Soares alega.

Jerente China Harbour asina karta kontestasaun iha loron 5 setembru 2019, nune’e agora nia husu atu extende tan loron lima nia laran hodi responde. Enkuantu Tribunál aseita prolonga hodi China Harbour hatama duni opozisaun ba providénsia kautelár iha 23 setembru 2019.

Notísia relevante : Tribunál Aseita Pedidu China Harbour ba Estensaun Períodu Kontestasaun

China Harbour Simu Ona Karta Atu Kontesta Marino Enterprise

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here