Adjuntu Diretora Interina JSMP Ana Paula Marçal. Imajen/Hortençio Sanchez

DILI, 16 Setembru 2019 (TATOLI) – Adjunta Diretora Interina Programa Monotorizasaun Sistema Judisiál (JSMP-sigla inglés), Ana Paula Marçal, hateten signifikasaun husi termu providénsia kautelar ne’ebé Tribunal hatun ba parte ruma, signifika atu hapara provizoriu atividade ka obra ruma tanba iha hela disputa laran.

“Providénsia kautelar ba kazu ruma signifika katak Tribunál hatun desizaun atu hapara atividade ba obra ruma ne’ebé iha hela disputa nia laran. Ezemplu, ha’u no ema ruma hadau malu hela rai no iha tempu hanesan ema ne’e halo hela atividade iha rai refere. Ha’u hatama kazu ne’e ba Tribunál no Tribunál haree katak iha disputa iha rai ne’e, nune’e hatun desizaun provizóriu atu hapara atividade iha área disputa hodi hein prosesu julgamentu no desizaun ba rai ne’e sé loos mak na’in ba rai ne’e”, Tenik Ana Paula ba Agência TATOLI, iha nia knaar fatin, Colmera,segunda ne’e.

Notísia Relevante: Jerente China Harbour Husu Tribunál Extende Tempu Kontestasaun Marino Enterprise

Nia dehan, relasiona ho disputa rai Kaitehu entre kompañia China Harbour no Marino Entrepreise, hapara provizóriu atividade iha rai disputa ne’e mak bolu dehan providénsia kautelar tanba seidauk hatene lolos na’in ba rai ne’e.

“Bainhira Tribunál desidi ona sé los mak na’in ba rai ne’e mak foin kompañia xineza ne’e kontinua uza ou konforme ba parte sira iha ne’ebá mak iha disputa nia laran Tribunál tenke hapara atu hein desizaun sé mak iha direitu ba rai ne’e,” nia esplika.

Nia dehan, parte ruma kuandu la satisfaz ho desizaun hosi Tribunál iha Konstituisaun Repúblika Demokrátika Timor-Leste (RDTL) no Kódigu Prosesu Penál mós fó dalan atu bele hatama rekursu ba Tribunál ne’ebé aas liu mak Tribunál Rekursu (TR).

“Polémika ne’ebé foin lalais akontese la’ós ema baibain mak halo hasoru Tribunál, ita nia líder boot ida mak sei halo nune’e ita mak hamihis konfiansa públiku ba Tribunál. Ita harii tia nu’udar orgaun soberania no ita harii tia sistema justisa maibé mosu fali intervensaun hirak hanesan ne’e tuir JSMP ne’e labele tanba povu baibain sira bele la fiar ona ita nia justisa,” nia haktuir.

Adjunta Diretora Interina akresenta, sé líder boot mak halo bebe’ik nune’e bele halo povu ki’ik sira la fó ona konfiansa ba servisu justisa nian iha Timor-Leste, maski antes ne’e servisu justisa halo esforsu makaas hodi fó justisa ne’ebé los ba ema hotu.

Tuir Ana Paula, kazu refere hanesan kazu sivíl, maibé Tribunál prosesa lais liu kompara ho kazu sivíl seluk Adjuntu Diretora Interina ne’e esplika.

“Ita tenke separa prosesu sivíl ne’ebé tama ona iha Tribunal ne’ebé laiha atividade ruma iha rai desputa, ne’e la presiza halo providensia kautelar, tanba la presiza hapara atividade ruma. Entretantu kazu foin lalais halo hela atividade iha rai disputa”, akresenta.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here