Sentru Komersiál Bonavide “One Stop Shop", Fatuhada, Dili. Imajen/Osória Marques

DILI, 12 outubru 2019 (TATOLI)-Negosiante Kampu Alor ne’ebé maioria sidadaun Indonéziu (WNI/Warga Negara Indonesia) hamutuk na’in 76 muda hikas ba sentru komersiál Bonavide “One Stop Shop”, Fatuhada, Dili, hodi hala’o sira nia atividade negósiu fa’an roupa.

Notísia Relevante : Governu Inaugura Gólgota Mall

Roupa sira ne’ebé fa’an iha Sentru Komersiál Bonavide “One Stop Shop”, Fatuhada, Dili. Imajen/Osória Marques

Negosiante WNI lubun boot ne’ebé durante tinan barak (2000-2019) okupa estrada ibun Kampu Alor nian hodi halo negósiu muda hotu ona husi fatin ne’ebá hodi kumpre Lei Governu Timor-Leste nian no maioria muda ba Sentru Komersiál  Gólgota, Comoro, Dili.

“Negosiante Kampu Alor mai husu fatin hodi sira fa’an sira nia roupa entaun ami mós hadi’a no oferese ba sira,” informa nain ba sentru komersiál Bonavide “One Stop Shop”, Lily Ivan Ching hodi responde Ajénsia TATOLI iha nia serbisu fatin, Sesta (11/10/2019).

Negosiante Kampu Alor sira ne’ebé halo akordu komersiál ho kompañia Bonavide Unipessoal, Lda, katak, kada fulan sira iha obrigasaun selu fatin arrendamentu $600 ba fatin ne’ebé medida boot uitoan no medida ki’ik ho iha arredores sira kada fulan selu $200.

Na’in ba kompañia Bonavide Unipessoal, Lily Ivan Ching.

Lily informa tan,  tanba atividade ne’e iha ligasaun ho komersiál, maka kompañia Bonavide iha obrigasaun atu selu taxa ba Estadu Timor-Leste porsentu 10 (10%).

Bonavide Unipessoal prepara fatin refere kompleta ho infraestrutura bázika hanesan eletrisidade, bee moos, hariis-fatin, pesoál seguransa ho mós ekipa hamoos fo’er (cleaner service).

“Investimentu ba hadi’a no preparasaun fízika ba fatin ne’e purvolta millaun $1.8 no mós iha planu atu alarga tan fatin ho kuartu 100 hanesan ne’e hodi nune’e bele oferese tan ba negosiante balu ne’ebé mak karik sei presiza,” hateten Lily Ivan Ching.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here