Zélia Miranda Lopes. Imajen/Domingo Piedade

DILI, 09 outubru 2019 (TATOLI)—Onra no priviléjiu boot ba alin feto Zélia Miranda Lopes, ne’ebé, ohin, asume knar no kompeténsia kmo’ok nu’udar Provedoria Direitu Umanu no Justisa (PDHJ-sigla portugés)  durante oras tolu nia laran, husi tuku 08:00-tuku 11:00 OTL.

Notísia Relevante : Aban, Zélia Miranda Lopes Sai Provedora PDHJ ba Oras Tolu

Provedora Zélia lidera surumutu Konsellu Diretivu PDHJ. Imajen/Domingos Piedade

Maubisse oan ne’ebé moris iha Manetu, Postu Administrativu Maubisse, Munisípiu Ainaro, 21 juñu 2006, hetan priviléjiu hodi substitui serbisu hotu ne’ebé kabe ba kompeténsia Provedoria PDHJ nian durante oras tolu iha Edifísiu PDHJ, Caicoli, Dili,

Zélia, oan ki’ak husi Aliansa Martins Borges no Julio de Araújo (matebian) durante ne’e hola parte mós hanesan membru Parlamentu Foin Sa’e hodi reprezenta nia Postu Administrativu Maubisse no sai lian ba lian laek sira iha Maubisse hodi hatutan iha plenária Parlamentu Foin Sa’e.

Provevora Zélia kaer liman ho Adjuntu PDHJ, Miguel Pereira de Carvalho. Imajen/Domingos Piedade

Zélia iha nia mehi boot mak hakarak sai ema ne’ebé serbí ema seluk liu husi profisaun hanesan profesora, tanba ne’e, nia hahú ona investe hodi estuda maka’as no halo diskusaun beibeik ho nia kolega eskola sira atu oinsá prepara sira nia bukae ba futuru.

“Ha’u kontente tebetebes sai provedora durante oras tolu iha Dili. Ha’u rekomenda ba konsellu diretivu PDHJ atu kontinua halo atividade ne’e no hala’o sira nia knar ho di’ak liu hodi bele asegura boa governasaun no luta maka’as kontra hahalok hotu ne’ebé viola povu nia direitu,” hateten Zélia bainhira dada lia ho Ajénsia TATOLI iha ámbitu hala’o hela knar no kompeténsia hanesan Provedora durante oras tolu.

Iha biban hanesan, Adjuntu PDHJ, Miguel Pereira de Carvalho nu’udar reprezenta PDHJ  agradese no fó benvinda ba provedora Zélia hodi hala’o serbisu ba oras tolu nia laran.

Iha audiénsia ho konsellu diretiva PDHJ nian, Provedora Zélia simu orientasaun kona-ba manual serbisu PDHJ nian, inklui simu relatóriu annual PDHJ nian.

Jornalista : Domingos Piedade Freitas

Editór       : Francisco Simões

 

1 KOMENTÁRIU

HAKEREK NO HATÁN

Please enter your comment!
Please enter your name here