Prezidente Autoridade Bobonaro, Jeferino dos Santos. Imajen/Antonio Goncalves

BOBONARO, 09 outubru 2019 (TATOLI)-Iha polítika Orsamentu Jerál (OJE) tinan fiskál 2020 nian, Autoridade Munisípiu  Bobonaro, tau prioridade ba infraestrutura báziku, hanesan hadi’a kondisaun estrada rural mai munisípiu, postu saúde, bee moos, eskola,  saneamentu no seluk-seluk tan.

Notísia Relevante : Tinan Barak, Balibo Enfrenta Problema Bee Moos

Prezidente Autoridade Munisípiu Bobonaro, Jeferino dos Santos, informa tuir planu dezenvolvimentu Integradu Munisipál (PDIM) 2020 iha projetu hamutuk 27, maibé 17 tenke elimina no implementa 10 de’it tanba Komisaun Revizaun Orsamentu Polítika aprova de’it orsamentu adisionál millaun  $1.4 hodi ezekuta ba projetu 10.

Tuir planu PDIM ami prioridade ba asuntu estrada urbana iha Kapitál Maliana, estrada rurál ne’ebé liga Maliana ho Postu Administrativu, Kailaku,  Lolotoe, Bobonaro no estrada área rural,’’ informa Prezidente Autoridade Bobonaro, Jefernio dos Santos, ba TATOLI iha Maliana, tersa (08/10/2019).

Iha tinan 2020, nia hateten, sei kontinua harii mós postu saúde tanba Munisípiu Bobonaro iha Suku 50, maibé ne’e foin hari’i postu saúde 27 no seluk seidauk.

Jeferino dos Santos hatutan, munisípiu ne’e iha prioridade suku barak, maibé labele implementa hotu tanba limitasaun orsamentu tanba ne’e sei kontinua fali ba tinan 2021.

Iha 2019, Bobonaro benefisia ona projetu infrastrutura husi Governu sentrál liuliu Ministériu Edukasaun no Ministériu Saúde hodi harii postu saúde pakote ho rezidénsia ba médiku hamutuk sia (9),  reabilitasaun no konstrusaun ba eskola tékniku vokasionál Malibaka iha Postu Administrativu Bobonaro  no  Atabae.

‘’Ami halo ona tenderizasaun no kompañia sira implementa ona, so falta de’it projetu postu saúde  ida maka seidauk implementa  tanba komunidade sira maka impede iha suku Molop, Postu Administrativu Bobobaro no problema ida seluk maka fatin ne’e rai igreja nian’’ Jefernio informa.

Nia hatete, bainhira problema ne’e  la rezolve, autoridade  Munisípiu sei foti desizaun hodi muda projetu ne’e ba suku seluk ne’ebé presiza urjente.

Projetu 11 ne’ebé implementa ona iha tinan 2019 gasta orsamentu millaun ida resin.

Jornalista     : Agapito dos Santos

Editór              : Francisco Simões

HAKEREK NO HATÁN

Please enter your comment!
Please enter your name here