Kondisaun ikus aktividades apredisasen estudante Eskola EBF Aiasa, Balibo ne'ebe anin sobu, foin lalais ne'e. Imajen/Antonio Goncalves

BOBONARO, 09 outubru 2019 (TATOLI)-Atu garante ambiente moos, seguru no saudavel ba povu Bobonaro, Prezidente  Autoridade Munisípiu Bobonaro  tau ona prioridade iha planu Orsamentu Jerál estadu (OJE) 2020  ba kapitál menór atu sosa karreta ida ba tula lixu iha sidade Bobonaro laran.

Notísia Relevante : Hadi’a Infraestrutura Bázika Kontinua Sai Prioridade ba Bobonaro iha 2020

Prezidente Autoridade Munisípiu Bobonaro, Jeferino dos Santos. Imajen/Antonio Goncalves

Prezidente Autoridade Munisípiu Bobonaro, Jeferino dos Santos, hatete, proposta OJE 2020 ne’ebé komisaun revizaun polítika orsamentu aprova ona Munisípiu Bobonaro hamutuk  millaun $7 ba saláriu vensimentu, bens servisu, transferénsia públika no kapitál menór.

Nia esplika, ba kapitál menór hamutuk rihun 320 ne’e maka sei uza hodi sosa karreta lixu ida, karreta SAS hodi fornese bee moos ba komunidade. Nune’e mós sosa komputadór, mákina imprime, ekipamentu eskritóriu ba servisu administrasaun Munisipál no Postu administrativu neen hanesan  Atabae, Balibo, Bobonaro, Kailako, Lolotoe no Maliana.

‘’Ami mós planu atu sosa tan karreta ba servisu operasaun munisipál tanba agora daudaun karreta sira uza ne’e komesa tempu UNTAET, no ami mós sei sosa motorizada ba kargu diretór Munisipál tanba durante ne’e sira uja transporte privada,”  informa Jeferino dos Santos, ba Ajensia TATOLI iha Bobonaro, tersa (08/10/2019).

Nia  fiar katak  ho prezensa karreta lixu ne’e sei fasilita servisu munisípiu nian atu hamoos lixu  ho efetivu liután no asegura sidade Bobonaro saudavel.

OJE 2019 Munisípiu Bobonaro iha millaun $4-resin ne’ebé ezekuta ba saláriu vensimentu, bens servisu no transferénsia públika.

Jornalista     : Agapito dos Santos

Editór              : Francisco Simões

HAKEREK NO HATÁN

Please enter your comment!
Please enter your name here