Aviaun militár Korea do Sul nian. Imajen/Nelia Borges

DILI, 07 outubru 2019 (TATOLI)- Ministru  Defeza no Ministru Interiór Interinu, Filomeno da Paixão de Jesus,  ohin, halo enkontru ho Tenente Jenerál Forsa Defeza Koreia do Súl, Lee Seokgu no mós reprezentante Ministru Defeza Koreia, Brigadeiru Jenerál,  Seo  Young-Man, hodi ko’alia  kooperasaun bilaterál iha setór defeza nian.

Notísia Relevante : Forsa Koreanu Vizita Hikas Timor-Leste Hafoin Tinan 20

“Enkontru ida ne’e atu diskute kooperasaun serbisu ne’ebé uluk Koreia haruka sira nia tropa mai hala’o misaun iha Timor-Leste ho INTERFET, no ita mós hatene katak ita nia traballadór Timoroan rihun serbisu iha Koreia, tanba ne’e sira mai para ita hametin liu tan kooperasaun  iha setór defeza,” informa n Ministru Filomeno Paixão ba jornalista iha Portu Dili.

Nia dehan, mezmu Governu Timor-Leste no Komandu F-FDTL seidauk estabelese kooperasaun ho forsa Koreia nian, maibé Timor-Leste sente orgullu, tanba iha tinan 1999 Forsa Koreia hola parte iha misaun dame Organizasaun Nasoins Unidas (ONU)-INTERFET.

Durante Timor-Leste restaura nia  independénsia, Governu Koreia fó mós apoiu ró militár tolu, ró rua fó ba Unidade Polisia Marítima (UPM)  no ró ida fó ba Forsa Navál F-FDTL.

Parte seluk, Ministru Filomeno  dehan, vizita delegasaun Forsa Koreia do Súl mai Timor-Leste hafoin iha tinan 20 liubá ajuda tebes Timor-Leste hodi hakotu funu iha 1999 ne’ebé Timoroan tomak sente too ohin loron.

Estadu Timor-Leste rasik fó onra ba ema sivíl husi ONU inklui militár Koreia na’in lima  ne’ebé mate iha asidente mota Noel Ekab, Postu Administrativu Oesilo, Rejiaun Administrativu Espesiál Oe-Cusse Ambeno (RAEOA).

 Militár Koreia sira ne’ebé mate iha asidente mota boot lori karreta iha loron 6 Marsu 2003 mak hanesan, Maiór Byong Jo Min, Maiór  Jin Kyu Park, Kopral, Jong Hun Membali no Kopral, Hee Choi no Kim Jung Joung.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here