Ministru Defeza no Ministru Interior Interinu, Filomeno da Paixão de Jesus, Komandante Ró Militár Militár "Qi Ji Guang" Contra- Almirante, Yu Wenbing no Vise Xefe Estadu Maiór Jenerál FALINTIL-Forsa Armada Timor-Leste, Brigadeiru Jenerál, Falur Rate Laek akompaña husi Embaixadór Xina mai Timor-Leste, Xiao Jiangua, vizita Ró Militár "Qi Ji Guang", iha Portu Dili. Imajen/Eugénio Pereira.

DILI, 07 outubru 2019 (TATOLI)- Ró Forsa Defeza Komponente Navál husi Xina  ho nia forsa na’in 500, ohin,  vizita Timor-Leste hodi hametin liu tan lasu kooperasaun  entre Timor-Leste ho Repúblika Populár Xina.

Forsa Defeza Komponente Navál Xina simu vizita Ministru Defeza no Ministru Interiór Interinu, Filomeno da Paixão de Jesus ho parade militár durante vizita Ró “Qi Ji Guang” iha Portu Dili. Imajen/Eugénio Pereira

Ró Militár ho naran “Qi Ji Guang” ne’ebé komanda husi Komandante Ró Militár Contra- Almirante, Yu Wenbing  atranka iha Portu Dili simu direita husi Ministru Defeza no Ministru Interior Interinu, Filomeno da Paixão de Jesus ho Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Brigadeiru Jenerál, Falur Rate Laek akompaña husi Embaixadór Xina mai Timor-Leste, Xiao Jiangua.

Embaixadór Xiao Jiangua dehan, vizita ne’e hodi manifesta aniversáriu estabelese relasaun diplomátiku entre Timor-Leste ho Xina ba dala-17 no mós aniversáriu Fundasaun Repúblika Populár Xina ba dala-70.

“Iha tempu ksolok ne’e, ita simu Ró Militár Navál Xina “Qi Ji Guang” hodi bele hametin liu tan lasu kooperasaun ne’ebé hala’o ona,” afirma Embaixadór Xiao  Jiangua iha nia diskursu.

Nia  hato’o agradesementu ba Governu Timor-Leste hodi simu vizita ekipa ró ne’e durante loron haat iha Timor-Leste hodi fó oportunidade ba povu Xina inklui emprezáriu Xina no populasaun Timor-Leste bele vizita ró refere.

Xina sei fó mós oportunidade ba Komandante PNTL  no ekipa Unidade Polisia Marítima (UPM) no Forsa Navál F-FDTL atu halo vizita ba ró hodi hametin liu tan kooperasaun.

Amizade entre Timor-Leste ho Xina dezde tinan naruk ona. Komesa tempu antigu, Timor-Leste maka parada importante iha Rota Maritima dezde  tempu uluk, rai Timor-Leste tama mós istoria livru Xina nian.

Nia hatutan, povu nasaun rua ne’e halo ona trading antes tinan atus hitu (700) resin. Rota Marítima de Seda ne’e mak ligasaun entre povu nasaun rua nia. Xina sempre hamriik hamutuk ho amigu Timor-Leste la’ós de’it iha prosesu istóriku kontra invazaun, buka ukun rasik-aan, no mós iha dalan hala’o dezenvolvimentu no realiza prosperidade.

“Ohin loron, durante ami nia atividade selebra Aniversáriu Fundasaun Xina ba dala 70, Ró Militár Navál Qi Ji Guang mai vizita Timor-Leste tuir Rota Marítima de Seda, lori mai tan amizade ida boot husi povu Xina ba povu Timor-Leste, lori mai tan Pás, Amizade no konfiansa mútua,” nia hatete.

Liu husi vizita ne’e hodi hetan motivasaun foun ba promove amizade tradisionál ne’e aprofunda kontinuamente ho kooperasaun jerál ne’ebé expandu konstante. Ró Qi Ji Guang la’ós Battleship tradisionál de’it, nia mós ró navio de treinamentu profisionál ho tonelajen boot iha mundu.

Iha ró laran tula mós membru estudante Universidade Navál Flutuante iha tasi  leten. Ró ne’e nia dezlokamentu besik rihun sanulu tonelada, iha nia leten, iha sala atria treinamentu sanulu resin ho estudante navál liu atus lima (500), ne’e mós sira nia viajen gradasaun, no mós viajen ba komunikasaun no amizade ho militár navál Xina ho Timor-Leste sei hala’o atividade vizita malu hodi hametin amizade.

Iha fatin hanesan, Komandante Ró Militár Contra- Almirante, Yu Wenbing  hato’o agradese ba Governu Timor-Leste hodi simu vizita ne’e.

“Ha’u kontente tebe-tebes bele mai vizita Timor- Leste ne’ebé furak loos ho Ró Militár Qi Ji Guang  mós hetan muitu benvindu husi ofisial senior politikál no militár nia ho kolega husi area oioin,”  Yu Wenbing hateten.

Komandante, Yu Wenbing hatutan,  vizita posu pozitivu tebes hodi hametin relasaun iha área militár nian no iha tempu besik Primeiru-Ministru, Taur Matan Ruak ho membru governu sira sei vizita ró refere.

Ró Militár Qi Ji Guang hala’o nia vizita husi Xina mai uluk iha nasaun Bruine no kontinua mai Timor-Leste. Husi Timor-Leste ró ne’e sei vizita ba Papua Nova Guinea, Nova Zelándia no nasaun seluk tan.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here