Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen/Egas Cristovão.

DILI, 07 outubru 2019 (TATOLI) – Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, promete sei investe maka’as iha Institutu Dezenvolvimentu Mão de Obra (INDMO) hodi bele kompete iha nivel rejionál no mundiál.

“Ha’u hakarak afirma filafali katak tinan oin ou tinan hirak tuir mai ha’u sei hato’o ba Primeiru-Ministru no ba Governu Daualuk ida ne’e katak dezenvolvimentu mão de obra tenke sai pilár krítiku ida ba iha setór ekonómiku”, Fidelis promete ida ne’e bainhira halo enkontru no vizita ofisiál dahuluk ba INDMO iha Lesidere, ohin, hodi rona mós preokupasaun.

“Tanba se ita la investe iha kualidade mão de obra sei labele kompete iha nivel rejionál, nivel mundiál tanba ita laiha kapitál traballadór sufisiente para kompete. Ita só iha nivel ki’ik, maibé treinadu katak ho esperiénsia ne’ebé bele kompete ba iha área sira ne’ebé komplexu, ho ida ne’e ita bele avansa”, katak.

Governante ne’e esklarese katak kuandu haree de’it ba iha númeru ema iha millaun 1.2 entaun imposivel kompete ho Indonézia, Tailándia, no Austrália tanba ne’e maka tenke haree duni ba iha kualidade mão de obra.

Atuál Ministru Reforma Lejizlativa no Asuntu Parlamentár ne’e hatutan Governu bele halo dezenvolvimentu fíziku oioin, maibé sein ema kualifikadu nasaun ne’e sei la bá oin.

“Ho ida ne’e foin lalais enkontru ho asesór ida, inklui asesór destakadu iha INDMO ninian hodi inteira filafali importánsia hosi INDMO nian no ha’u konkorda fó importánsia ne’ebé INDMO hanesan ajénsia dezempeñu”, katak.

Ba setór ekonómiku MKAE interinu ne’e haree laiha dúvida katak ne’e kuartu ida área prioritaria ba Timor-Leste.

Notísia relevante : MKAE Rona Preokupasaun Husi INDMO

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here