Ministru Koordenadór Asuntu Ekonómiku (MKAE), Fidelis Manuel Leite Magalhães, hala'o enkontru ho estrutura Institutu Dezenvolvimentu Mão-de-obra (INDMO), iha salaun enkontru NDMO, Lesidere, Segunda (7/10/2019). Imajen TATOLI/Antónia Gusmão.

DILI, 07 outubru 2019 (TATOLI)- Ministériu Koordenadór Asuntu Ekonómiku (MKAE) interinu, Fidelis Manuel Leite Magalhães, ohin, halo vizita ofisiál ida ba Institutu Nasionál Dezenvolvimentu Mão-de-Obra (INDMO) hodi rona preokupasaun.

Kestaun ne’ebé INDMO hasoru durante ne’e maka falta fasilidade, rekursu umanu, no edifísiu, nune’e bele halo servisu ho di’ak liután.

“Preokupasaun ne’ebé INDMO hasoru maka falta fasilidade hodi ajuda sira bele hala’o funsaun ho di’ak”, Fidelis Manuel Leite Magalhães dehan hafoin hala’o enkontru ho autoridade INDMO iha Lesidere, ohin.

Maski ho difikuldade barak maibé atuál Ministru Reforma Lejizlativa no Asuntu Parlamentár ne’e enkoraja nafatin INDMO atu servisu di’ak liután.

“Ho kondisaun mínimu maibé sira nafatin hala’o servisu, no sira halo buat barak ona, maibé ita sei iha tempu naruk iha futuru para atu di’ak liután no Governu sei fó atensaun boot liután ba INDMO atubele dezempeña funsaun ho di’ak liután”, dehan Fidelis Manuel Leite Magalhães.

Kona-ba preokupasaun ne’e, governante ne’e dehan sei tau konsiderasaun másima, se la tinan 2020 entaun muda ba 2021, liuliu maka edifísiu nune’e bele fó atendimentu ba públiku.

Diretora Nasionál INDMO, Isabel Fernandes de Lima, dehan espasu ne’ebé daudaun iha la sufisiente atu sira hala’o knaar ho di’ak.

“INDMO hanesan instituisaun autónoma, hanesan mós órgaun reguladór ida mós ba sentru formasaun hotu iha Timor-Leste. Asuntu importante liu ami levanta iha hasoru malu ne’e maka fasilidade ne’ebé maka adekuada ba ami para asegura kualidade rejistu no atendimentu ba sentru formasaun sira iha rai-laran. Tanba fó kondisaun adekuadu ba ami sei reforsa ami atu hala’o ami nia kna’ar ne’ebé di’ak liután”, hateten Diretora Nasionál INDMO, Isabel Fernandes de Lima.

Isabel esklarese, maski ho kondisaun mínima maibé sei la hamate sira-nia vontade ba servisu.

Entretantu, INDMO estabelese bazeia ba dekretu lei númeru 6/2017, alterasaun daruak dekretu lei númeru 8/2008 iha 8 marsu kona-ba kriasaun INDMO ne’e rasik.

Papél INDMO maka define aprovasaun padraun kompeténsia ba setór produtividade oioin iha Timor-Leste, sertifika kompeténsia bazeia ba padraun ne’ebé aprova ona.

Nune’e mós sertifika sentru formasaun no negósiu atu dezempeña hanesan sentru avaliasaun kompeténsia no mós fó sertifikasaun ba formadór sira. Promove arranjamentu atu fó dalan ba estabelesimentu protokolu públiku ka kooperasaun privada.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here