Vasina. Ilustrasaun

DILI 07 outubru 2019 (TATOLI)- Xefe Sentru Saúde Comoro, Abel do Santos esplika katak moras sarampu rubela akontese ba labarik sira tanba labarik sira fulan sia ba leten la halo vasinasaun kumpleta.

“Labarik to’o fulan sia tenke hetan vasinasaun sarampu rubela doze primeiro no mai to’o iha fulan sanulu resin ualu tenke  vasina tan sarampu doze segundo maibé sira vasina la kompletu tanba ne’e mak moras  sarampu komesa fila fali,” dehan Xefe Abel do Santos ba Ajénsia TATOLI bainhira partisipa atividade poco-poco no zumba, iha Sentru Saúde Comoro, iha sábadu ne´e.

“Agora iha intervensaun  ne’ebé ita halo ne’e iha tipu rua; primeiru ita halo vasinasaun normál  signifika ita buka labarik ne’ebé iha fulan sia to’o tinan lima ita tenke halo vasinasaun kompleta. Tipu segundu mak ema ne’ebé mak iha sarampu rubela ezemplu  iha Área Dom Aleixo kona ona moras sarampu entaun  aldeia ida ne’e ita tenke sona iha fulan sia to’o tinan 40,” esplika tan ezekutivu ne´e.

Iha biban ne´e, nia informa mós katak iha Sentru Saúde Comoro, iha fulan agostu deteta moras sarampu pozitivu ba labarik fulan sia to’o tinan lima hamutuk na´in sanulu.

Área Dom Aleixo ne’e área ne’ebé mak boot no populasaun barak entaun ita hatene Munisípiu Dili ne’e munisipiu sira seluk  ne’ebé mak tama sai entaun bele da´et ba malu.

“Moras sarampu fofoun  ami Dom Aleixu hetan ne’e  husi Munisípiu Aileu mak mai da´et ba família  uma kain ida iha Fomentu no Tasi Tolu mak da´et tomak ba iha área Comoro  no mos Manleuana nian,” dehan Xefe Sentru Saúde Comoro, Abel dos Santos.

Kama La Sufisiente

Lider másimu Sentru Saúde Comoro ne´e informa mós ba Ajénsia TATOLI katak Sentru Saúde Comoro fatin ba partus inan isin-rua nian klot no númeru pasiente sira ba partu iha sentru ne´e barak no kama la sufisiente ba sira.

“Inan isin-rua  loron ida mai ema na´in 10 maibé kama iha hitu de´it maibé kama ida muda ba koredór entaun kama la sufisinte tebes. Depois sala observasaun ne’e la serve ona para halo observasaun maibé ida ne’e tenke halo internamentu. Internammetu ne’e ninia hahú  husi kama 10 ka 15 maibé agora dadaun iha sala observasaun ne’e iha kama tolu de´it,” nia haktuir.

Médiku timoroan ne´e mós relata katak moras ne´ebé domina iha Sentru Saúde Comoro mak Infesaun Vias Respiratória, TB (Tuberkuloze) no Sarampu, hahú husi janeiru to´o setembru.

Nia dehan tan, rekursu umanu mós la sufisiente tanba iha sentru saúde ne’e iha suku haat no problema agora hasoru mak iha karreta multifunsaun aat durante fulan neen ona maibe to’o agora seidauk iha manutensaun ruma ba iha karreta multifunsaun ida ne’e.

“Ita iha difikuldade uitoan tanba karreta aat no atu ba buka tuir labarik sira ne’ebé seidauk iha vasina husi idade fulan sia to’o tinan lima iha Dom Aleixo ne’e labele la´o ho di´ak tanba ita difikulta ba transporte ambulánsia”.

Enkuantu, kona-ba profisionál saúde sira hanesan médiku, enfermeiru no parteira sira ne´ebé hala´o kna´ar iha Sentru Saúde Comoro, tuir Xefe Abel dos Santos katak besik ema 100.

Notísia relevante:Durante Agostu, Iha Munisípiu Dili Rejistu Pasiente Sarampu Rubela Hamutuk 69

Jornalista :Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here