Ilustrasaun sarampu

DILI, 05 outubru 2019 (TATOLI)-Pesoál saúde sira husi Sentru Saúde sira iha Munisípiu Dili, halo analiza no ezamina, deteta katak durante fulan agostu nia laran rejistu pasiente ho moras sarampu rubela hamutuk ema na´in 69.

“Ita hahú detetasaun  liuhusi vijilánsia no ita mós halo ezaminasaun liuhusi laboratóriu, ita mós nafatin esforsu halo edukasaun fízika hodi sensibiliza ba família hothotu depois ita mos halo prevensaun  direita ba komunidade ne’ebé mak afeita no liuliu ba labarik sira,”dehan Diretora Saúde Munisipiu Dili, Agostina da Costa Seguradu ba ajénsia TATOLI bainhira ramata atividade Poco-Poco no Zumba iha  Sentru Saúde Comoro, ohin.

Diretora ne´e informa tan katak pesoál saúde sira mós halo hela vizita tama sai uma para nafatin kobre labarik sira ne’ebé mak la hetan  vasina sarampu rubela.Halo intervensaun  tama sai uma liuhusi fasilidade idaidak ne’ebé lao ona hodi nune’e kobre halo vasina  para halo prevensaun ba labarik tinan lima mai kraik.

“Ita iha planu ba iha minikampaña ba intervensaun ne’e, foka liubá Sentru Saúde Comoro ho Vera kruz atu bele foti labarik sira ho idade tinan sia to’o tinan 15,  ita sei halo vasina doze segundo ba iha sarampo rubela,” nia haktuir.

Ezekutiva ne´e relata sarampu rubela ne’e hahu iha tinan 2015 depois integra ba iha programa rutina no iha kada fasilidade saúde sira.

Depois iha tinan 2018, ita mós iha ona sertifikadu husi Organisazaun  Mundiál Saúde (OMS),  ita elemina sarampu rubela no oferese sertifikadu ida ne’e maske ita iha kazu na´in sanulu maibé governu liuhusi Ministériu Saúde tun mai  munisipál to’o  iha postu adminstrativu.

“Ami tenke kobre ona esforsu ema hotuhotu  liuhusi labarik sira husi  fulan sia to’o iha  tinan lima tenke hetan vasinasaun doze  segundo husi sarampu rubela hodi nune’e ita alerta ba mundu katak ita-nia labarik hotu iha Timor-Leste  ida ne’e bele livre ona husi moras sarampu rubela,” tenik ezekutiva ne´e.

Iha biban hanesan,  Diretora Saúde Munisípiu Dili, Agostina Seguradu dehan númeru moras sarampu iha Sentru Saúde Dili laran aas mak Sentru Saúde Comoro  no tuir  mai iha Sentru Saúde Vera Cruz no sentru sira seluk dadus zero hela.

“Prevensaun ba labarik sira ho vasinasaun rubela hahú husi fulan sia to’o tinan lima depois ita hetan rekomendasaun husi Organizasaun Mundiál  Saúde ita hahú fali injesaun fulan sia to’o tinan 40. Ida ne’e mak ita halo intervensaun direita ba iha familia ne’ebé mak nia oan afeita ba sarampu,” nia esplika.

Jornalista: Felicidade  Ximenes

Editór      : Rafy Belo 

HAKEREK NO HATÁN

Please enter your comment!
Please enter your name here