Sekretáriu Estadu Formasaun Profisionál no Empregu, Julião Da Silva, akompaña husi Ministra Finansa ein Ezersísiu, Sara Lobo Brites, lansa Relatóriu Dahuluk ba Levantamentu Nasionál Traballu Infantíl no Relatóriu Mini Levantamentu Forsa Traballu 2016, iha Ministériu Finansa, Aitarak-Laran, segunda (07/10/2019). Imajen Tatoli.

DILI, 07 outubru 2019 (TATOLI) – Ministra Finansa interina, Sara Lobo Brites, hatete tenke hala’o sensibilizasaun ba umakain sira liuliu iha área rurál atu inan-aman sira iha koñesimentu natoon kona-ba impaktu labarik la bá eskola no okupa liu tempu ba ajuda serbisu uma laran nian.

“Labarik sira mak futuru ba nasaun no futuru nasaun sei depende ba jerasaun foun sira, bainhira ita-nia labarik sira ne’e la eskola tanba de’it tenke ajuda serbisu inan-aman nian, labarik sira sei la kompetitivu iha futuru no laiha oportunidade atu hetan serbisu di’ak”, dehan atuál Vise-Ministra Finansa iha ámbitu lansa relatóriu dahuluk ba levantamentu Nasionál kona-ba Traballu Infantíl no relatóriu mini levantamentu Forsa Traballu 2016, iha Aitarak-Laran, ohin.

Relatóriu Peskiza Infantíl 2016 hatudu, dadus rejista aumenta maka’as no haree labarik barak partisipa iha traballu infantíl hahú tinan 5 to’o 12 kuaze porsentu 20 no labarik tinan 13 to’o 14 sa’e 20,8%.

Peskiza ne’e hatudu labarik sira gasta tempu barak liu hodi ka’er serbisu duké eskola ou estuda, tanba ne’e relatóriu ida ne’e tenke divulga ba parte hotu-hotu liuliu inan-aman atu hala’o esforsu hodi elimina liña traballu infantíl iha Timor-Leste.

“Ita hotu hatene ne’e la’ós fásil tanba ita-nia kostume no tempu naruk ita mós hanesan infantíl ita ajuda inan-aman hanesan obrigasaun ida, maibé ohin loron mundu modernu ne’ebé ita hotu-hotu tenke hanoin labarik sira-nia futuru no nasaun nia futuru”, Sara katak.

Dadus Peskiza Traballu Infantíl ne’e nia dehan, sai sasukat atu tulun Governu no parseiru sira atu define polítika no esforsu oin-oin atubele halakon traballu infantíl iha forma hotu-hotu iha Timor Leste.

Iha fatin hanesan Sekretáriu Estadu Formasaun Profisionál no Empregu (SEFOPE), Julião da Silva, hatete kontinua halo sosializasaun maka’as iha munisipiu 12 inklui RAEOA hodi redús labarik menór ne’ebé hala’o atividade ekonómika.

“Ami sei kontinua demonstrasaun para hato’o ba públiku atu hapara labarik sira hala’o atividade ekonomia tanba labarik sira la merese atu halo serbisu, maibé tenke estuda ka eskola”, sujere.

Aléinde ne’e nia hatutan sobre peskiza númeru dezempregu ne’ebé hala’o iha 2010 to’o 2013 ho 10% no iha mini peskiza 2016 ne’e ho 10, 4% ne’ebé laiha mudansa boot liu.

Atu kombate dezempregu, nia dehan SEFOPE kontinua formasaun profisionál liuliu harii sentru formasaun exelente iha Ázia atu kapasita joven sira hodi kompete iha merkadu traballu.

“Ita hakarak tinan oin halo peskiza ba empregu foun hira no dezempregu hira atu hatene loloos, nune’e Governu bele halo polítika no lori kontribui ba redús dezempregu”, katak

Diretór Jerál Estatístika, Elias dos Santos Ferreira, dehan relatóriu rua ne’e finaliza iha tinan 2016, maibé la konsege publika tanba iha impase polítika iha tinan 2017 to’o 2018.

“Ami planeia atu halo peskiza foun ba sensu umakain, traballu infantíl no forsa traballu iha tinan 2020”, nia kompromete.

Relatóriu ne’e kobertura ba umakain 1.775 husi Munisípiu 12 inklui Rejiaun Administrativu Espesiál Oekusi-Ambenu (RAEOA).

Hosi totál umakain ne’e, maizumenus labarik na’in 67.688 (idade tinan 5-17) ka hanesan porsentu 16,1 mak hela ekonomikamente ativu iha área rurál no urbana sira.

Hosi porsentu 16,1 labarik sira ne’ebé mak ativu ekonomikamente, porsentu 12,5 hola parte iha traballu infantíl no maioria hosi sira-ne’e (55,5%) halo serbisu perigozu.

Hosi totál populasaun labarik, porsentu 83,8 mak tuir eskola, maibé labarik sira iha traballu infantíl iha probabilidade menus atu tuir eskola.

Maizumenus labarik na’in-43.000 (idade tinan 5-17) mak relata katak sira nunka tuir eskola; entre labarik sira ne’e na’in-6.455 mak hola parte iha atividade ekonómika, na’in-4.901 iha traballu infantíl, no na’in-2.888 halo servisu perigozu.

Mini-Levantamentu Forsa Traballu 2016 ho naran “Levantamentu Forsa Traballu Timor-Leste 2010-2013-2016.Taxa partisipasaun iha forsa traballu sa’e bá beibeik durante tinan hirak nia laran hosi porsentu 24,0 iha 2010, porsentu 30,6 iha 2013 to’o porsentu 46,9 iha 2016.

Proporsaun ema iha empregu ba populasaun mós sa’e neineik-neineik hosi porsentu 22 iha 2010, sa’e to’o porsentu 27,3 iha 2013, to’o porsentu 42,9 iha 2016. Taxa dezempregu sa’e hosi porsentu 7,8 iha 2010, to’o porsentu 11,0 iha 2013 no tun uitoan to’o porsentu 10,4 iha 2016.

Notísia relevante : TL Lansa Relatóriu Peskiza Traballu Infantíl no Mini Peskiza Forsa Traballu 2016

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here