Governu Timor-Leste liuhosi Ministériu Finansa no Sekretáriu Estadu Formasaun Profisionál no Empregu (SEFOPE) lansa relálatoriu dahuluk ba levantamentu Nasionál kona-ba Traballu infantil no relatoriu Mini-Levatamentu forsa Traballu 2016. Imajen/Florencio M. Ximenes.

DILI, 07 outubru 2019 (TATOLI) – Governu Timor-Leste liuhosi Diresaun Jerál Estatístika Ministériu Finansa (MF) no Sekretáriu Estadu Formasaun Profisionál no Empregu (SEFOPE) lansa relatóriu dahuluk ba levantamentu Nasionál kona-ba Traballu Infantíl no relatóriu mini levantamentu Forsa Traballu 2016.

Levantamentu Traballu Infantíl 2016 ne’e ho apoia téknika husi Organizasaun Internasionál Traballu (ILO, sigla inglés).

Ministra Finansa ein funsaun Sara Lobo Brites, hatete Governu Timor-Leste halo pasu importante iha nia esforsu atu halakon traballu infantíl iha nia forma hotu-hotu, liuliu forma liuhosi traballu infantíl ho lansamentu no publikasaun relatóriu analítiku husi levantamentu Nasionál kona-ba Traballu Infantíl iha Timor-Leste 2016.

Apoiu husi ILO mak fornese liuhosi akordu kooperativa sira kona-ba Programa Asaun Globál ba Asuntu Traballu Infantíl (GAP 11) no projetu konxiensializaun kona-ba sasukat no engajamentu polítika atu aselera asaun kontra traballu infantíl no traballu forsadu (MAP 16), finansiamentu husi Estadu Unidu nia Departamentu Traballu.

Sara Lobo Brites friza relatóriu ida ne’e mós ligadu ho ajenda 2030 ba Dezenvolvimentu Sustentável bazeia ba objetivu 8 (Promove kreximentu ekonómiku sustentadu, inkluzivu no sustentavel, empregu plenu no produtivu no serbisu desente ba ema hotu) ne’ebé ezije ba medida imediatu no efetivu atu halakon traballu forsadu, hapara eskravidaun moderna no tráfiku umanu inklui asegura proibisaun no halakon forma aat husi traballu infantíl.

“Futuru Timor-Leste hela iha jerasaun futuru nia liman. Labarik sira-ne’e nu’udar ita-nia futuru, nune’e Levantamentu Traballu Infantíl ne’e nu’udar instrumentu xave iha implementasaun programa no inisiativa governamentál ne’ebé fasil liu atu sasukat, no bele uza nu’udar instrumentu ida ba melloria sustentável kontinua ba futuru”, dehan Sara Lobo iha ámbitu lansamentu relatóriu rua ne’e iha edifísiu MF Aitarak-Laran, ohin.

Iha fatin hanesan, Country Director ILO ba Indonézia no Timor-Leste, Michiko Miyamoto, dehan ILO fó parabéns ba esforsu konkretu ne’ebé Governu Timor-Leste halo liuhosi publikasaun levantamentu traballu infantíl importante ne’e.

Michiko dehan relatóriu nia deskobre xave sira sei krusiál ba futuru dezenvolvimentu ba polítika no programa relevante sira atu realiza futuru ida halo traballu infantíl rai ida ne’e.

Dadus ne’ebé aprezenta iha levantamentu traballu infantíl ne’e fornese ona komprensaun kle’an liu ba parte-interesada sira hotu iha rai ne’e kona-ba realidade ba labarik sira ne’ebé serbisu, karaterístika sira hosi serbisu ne’e sira halo, indústria no empregu iha ne’ebé sira hola parte no sira-nia atinjimentu edukasionál.

Sekretáriu Estadu Formasaun Profisionál no Empregu, Julião da Silva, dehan deskoberta sira hosi Mini Levantamentu Forsa Traballu 2016 sei kontribui ba baze koñesimentu no fó tulun ba planeamentu no formulasaun polítika Oitavu Governu Konstitusionál nian.

Maioria Labarik Husi Porsentu 12,5 Halo Serbisu Infantíl Ne’ebé Perigozu

Relatóriu Levantamentu Nasionál kona-ba Traballu Infantíl kobertura ba umakain 1.775 husi Munisípiu 12 inklui Rejiaun Administrativu Espesiál Oekusi-Ambenu (RAEOA).

Husi totál umakain ne’e, maizumenus labarik na’in 67.688 (idade tinan 5-17) ka hanesan porsentu 16,1 mak hela ekonomikamente ativu iha área rurál no urbana sira.

Razaun prinsipál tanba labarik sira mak ativu ekonomikamente atu suplementa sira-nia família nia rendimentu no labarik maioria ne’e servisu ba sira-nia família rasik, tuir fali ho servisu iha plantasaun ou to’os ka kantreru.

Hosi porsentu 16,1 labarik sira ne’ebé mak ativu ekonomikamente, porsentu 12,5 hola parte iha traballu infantíl no maioria hosi sira-ne’e (55,5%) halo servisu perigozu.

Hosi totál populasaun labarik, porsentu 83,8 mak tuir eskola, maibé labarik sira iha traballu infantíl iha probabilidade menus atu tuir eskola.

Maizumenus labarik na’in-43.000 (idade tinan 5-17) mak relata katak sira nunka tuir eskola, entre labarik sira-ne’e na’in-6.455 mak hola parte iha atividade ekonómika, na’in-4.901 iha traballu infantíl, no na’in-2.888 halo servisu perigozu.

Durante Levantamentu Traballu Infantíl, dadus adultu ne’e mós rekolla hosi membru seluk iha umakain. Dadus adultu nian fornese dadus xave barak ne’ebé jeralmente rekolla hosi levantamentu forsa traballu konvensionál sira.

Mini Levantamentu Forsa Traballu 2016 ho naran “Levantamentu Forsa Traballu Timor-Leste 2010-2013-2016.

Tendénsia prinsipál sira bazeia ba dadus armonizadu fornese ona série tempu hosi indikadór traballu xave sira durante períodu tinan tolu nia laran, ho objetivu atu analiza evolusaun hosi indikadór forsa traballu prinsipál sira. Deskoberta xave sira inklui, taxa partisipasaun iha forsa traballu sa’e bá beibeik durante tinan hirak nia laran hosi porsentu 24,0 iha 2010, porsentu 30,6 iha 2013 to’o porsentu 46,9 iha 2016.

Proporsaun ema iha empregu-ba-populasaun mós sa’e neineik-neineik hosi porsentu 22,1 iha 2010, sa’e to’o porsentu 27,3 iha 2013, to’o porsentu 42,9 iha 2016.

Taxa dezempregu sa’e hosi porsentu 7,8 iha 2010, to’o porsentu 11,0 iha 2013 no tun uitoan to’o porsentu 10,4 iha 2016.

Empregu iha agrikultura, floresta no peska hela hanesan atividade ekonómika ho númeru aas liu hotu.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here