Komisaria Komisaun Nasionál Diretu Labarik, Dinorah Granaderio. Imajen/Egas Cristovão.

DILI, 07 outubru 2019 (TATOLI) – Komisária Nasionál Direitu Labarik (KNDL), Dinorah Granadeiro , hateten iha 2020, sei kria ekipa task force ida hodi halo sosializasaun ba munisípiu 12 inklui Rejiaun Administrativa Espesiál Oekusi-Ambenu atu sosiedade ka inan-aman sira labele haruka oan sira sai autór ba ekonomia uma laran.

“Ita presiza fó koñesimentu kle’an atu inan-aman bele hatene katak sé mak iha obrigasaun atu sustenta ekonomia uma laran, no tenke haruka nia oan sira bá eskola ka estuda”, Komisária KNDL ne’e afirma iha Ministériu Finansa, Aitarak-Laran, ohin.

Dinorah Granadeiro dehan KNDL hahú diskute ho ekipa task force sira mak Ministériu Solidariedade Sosiál no Inkluzaun (MSSI), Ministériu Edukasaun, Juventude no Desportu (MEJD), Sekretáriu Estadu Formasaun Profisionál no Empregu (SEFOPE) hodi bele minimiza traballu infantíl iha Timor-Leste.

“Ami hamutuk MSSI liuliu ba Diresaun Bolsa da Mãe atu identifika ona labarik sira ne’e no nesesidade família obrigada duni sira tenke halo serbisu, oinsá ita husi parte Governu apoia atu redús partisipasaun iha traballu infantíl”, katak.

Nia salienta KNDL mós diskute ona ho MEJD atu fasilita labarik sira hodi asesu eskola públika sira ne’ebé besik iha sira-nia fatin atu sira goza duni direitu ba edukasaun.

“Ita tenke hahú halo atu kontribui ba redusaun númeru ba traballu infantíl iha Timor-Leste tanba labarik mak futuru nasaun nian”, nia afirma.

Komisária KNDL ne’e adianta sosiedade hotu-hotu tenke hamutuk ho Governu liuliu planu orsamentál sira hodi bele servisu ho esforsu aan atu minimiza traballu infantíl iha Timor-Leste.

Nia dehan KNDL mós hahú halo ona identifikasaun ba labarik sira ne’ebé halo atividade ekonomia no husu nia identidade no husu profesór sira, maibé labarik maioria ne’ebé fa’an sasán iha Dili mai husi munisípiu sira.

Nune’e, Komisária ne’e agradese ba Ministériu Finansa liuhusi Diresaun Jerál Estatístika no SEFOPE lansa relatóriu ne’e tanba ajuda tebes KNDL atu halo advokasia.

Enkuantu, tuir relatóriu ne’ebé kobertura ba uma-kain 1.775 husi Munisípiu 12 inklui Rejiaun Administrativu Espesiál Oekusi-Ambenu (RAEOA).

Husi totál uma kain ne’e, maizumenus labarik na’in 67.688 (idade tinan 5-17) ka hanesan porsentu 16,1 mak hela ekonomikamente ativu iha área rurál no urbana sira.

Hosi porsentu 16,1 labarik sira ne’ebé mak ativu ekonomikamente, porsentu 12,5 hola parte iha traballu infantíl no maioria hosi sira-ne’e (55,5%) halo servisu perigozu.

Hosi populasaun totál labarik, porsentu 83,8 mak tuir eskola, maibé labarik sira iha traballu infantíl iha probabilidade menus atu tuir eskola.

Maizumenus labarik na’in 43.000 (idade tinan 5-17) mak relata katak sira nunka tuir eskola; entre labarik sira-ne’e na’in 6.455 mak hola parte iha atividade ekonómiku, na’in 4.901 iha traballu infantíl, no na’in 2.888 halo servisu perigozu.

Notísia relevante : Hapara Traballu Infantíl Tanba Labarik Sira Tenke Estuda

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here