Diretór Alfándega Postu Salele, Munisípiu Covalima, José Alves Caldas. Imagen TATOLI: Tomé Amado

COVALIMA 04 Outubru 2019 (TATOLI)-Durante fulan ualu (8) Janeiru too Agostu 2019 nia laran, Autoridade Auduaneiru (AA) ka Alfándega Munisípiu Covalima konsege rekolla taxa hamutuk rihun $55.510,87 hodi hatama ba kofre estadu.

Orsamentu ne’e parte Alfándega rekolla husi taxa importasaun sasán nesesidade báziku no sasán infraestrutura ne’ebé importadór no negosiante sira sosa husi Atambua-Kupang Indonézia lori tama liuhusi Fronteira Salale, Munisípiu Covalima nian.

“Durante fulan Janeiru too Agostu 2019 ita foin rekolla osan hamutuk $55.510,87. Osan ne’e tama barak husi volume importasaun sasán infraestrutura no negosiante sira ne’ebé ba sosa sasán nesesidade báziku maka kontribui selu taxa,” dehan Diretór Alfándega Postu Salele, Munisípiu Covalima, José Alves Caldas  ba Ajénsia TATOLI.

Tuir relatóriu estatístika iha fulan taxa iha Janeiru $4,255.25, Fevereiru $5,623.27, Marsu $7,855.38, Abríl $6,763.78,  Maiu $7,763.10, Junho $7,617.25,  Jullu $$7,647.24 no Agostu $7,815.56 ho montante $55.510,87.

Diretór Caldas konsidera volume taxa tinan 2019 nian ki’ik liu, tanba movimentu volume importasaun tinan ne’e menus.

“Tinan ne’e foin iha fulan klaran taxa ki’ik liu, tanba ita haree movimentu importasaun sasán menus liu, tanba sasán nesesidade báziku maka barak liu,” tenik nia.

Caldas hatutan, iha tinan 2018 nia laran taxa sa’e makas, tanba Governu implementa projetu infraestrutura besik 33 iha Covalima hodi hadi’a estrada nasionál, konstrusaun edifísiu Aeroportu Internasionál, Kay Rala Xanana Gusmão no auto Estrada Suai ba Zumalai nian.

2018 Rekolla ona Taxa $165,346

Antes ne’e iha tinan 2018, Alfándega Covalima rekolla ona taxa hamutuk $165,346.97  kompostu husi fulan Janeiru $20,510.50, Fevereiru $15,276.85, Marsu $19,167.02, Abríl  $16,896.03, Maiu $11,752.17, Junho $8,654.34, Jullu $6,716.52, Agostu $26,072.49, Setembru $14,415.38,  Outubru $10,169.34, Novembru $10,169.34 no Dezembru $5.414.32.

Durante ne’e, Alfándega mós la identifika ema ruma ba lori sasán kontra bandu hanesan lori sasán ilegál, maibé negosiante balun maka lori sasán la deklara totál sasán iha invoice, bainhira identifika selu de’it pinalty tuir lei.

Kriasaun Postu Integradu Fronteira iha Salele-Covalima, Batugadé-Bobonaru, Sakato Oekusi reprezenta siginifika meilloria ida no kontrola vijilánsia iha fronteira sira ba ema no sasán tama sai, enkuantu  nu’udar fasilitator husi relasaun komersiál  no sosiál entre Timor-Leste no Indonézia no mós hanesan kondutór ba kooperasaun no kolaborasaun entre departamentu fronteira husi país rua ne’e.

Postu integradu iha fronteira aprezenta iha nivel altu husi Departamentu Reseita no Alfándega ka modelu operasaun aplikada, bele mós husi teknolojia ne’ebé uza, inklui sistema ekipamentu entrada X-Ray no vijilánsia.

Projetu ne’e nu’udar realizasaun importante husi governu hatudu momoos pasu estratéjiku para atu atinji multiplus objetivu, inklui armonizasaun husi servisu fronteira entre ajénsia nasionál sira, hanesan mós Alfándega, Imigrasaun, Unidade Patrullamentu Fronteira, Kuarentena, Unidade Health (Saúde), no sira seluk, no prevensaun ida ke di’ak atu kombate krime iha zona fronteira, iha partikulár  ba bolu atensaun ba modu krime globál no transnasionál.

Postu Fronteira Salele mós inklui portu ba ró ne’ebé nia funsaun atu asegura kontrola maritima no hamenus komérsiu ilegál entre Indonézia no Timor-Leste.

José hatutan, durante ne’e Alfándega Salele hatama reseita ki’ik bainhira kompara ho Alfándega Batugadé ne’ebé sai nu’udar odamatan boot hatama reseita ho kuantidade boot liu númeru daruak hafoin númeru dahuluk husi Alfándega Portu Dili.

Entretantu, ba daudaun ne’e membru Alfándega ne’ebé hala’o servisu iha Alfándega Covalima hamutuk ema na’in 15 kompostu husi na’in haat (4) iha Aeroportu Internasionál, Kay Rala Xanana Gusmão no na’in 10 inklui feto ida iha  Postu Salele nian.

Notísia relevante:Presiza Aumenta Tan Rekursu Tékniku Profisionál Iha Alfándega Covalima

Jornalista : Eugénio Pereira

Editór       : Rafy Belo

HAKEREK NO HATÁN

Please enter your comment!
Please enter your name here