Diretór Alfándega Postu Integradu Salele, Munisípiu Covalima, José Alves Caldas. Imajen TATOLI: Eugénio Pereira

COVALIMA 04 Outubru 19 (TATOLI)-Diretór Alfándega Postu Integradu Salele, Munisípiu Covalima, José Alves Caldas  dehan,  governu presiza aumenta tan rekursu tékniku profisionál Alfándega iha Postu Salele nian hodi reforsa servisu kontrolu di’ak liután.

Númeru membru  Alfándega iha Covalima hamutuk ema na’in 15 kompostu husi na’in haat (4) iha Aeroportu Internasionál, Kay Rala Xanana Gusmão no na’in 10 iha  Postu Salele nian ne’ebé daudaun ne’e hala’o hela servisu la sufisiente.

Caldas esplika, nia parte aprezenta ona proposta ba Diretór Jerál Alfándega, José António Fátima Abílio ba tinan 2020 sei rekruta tan ema na’in 20, maibé  númeru ne’e sei la sufisiente nafatin.

“Konforme ami rua Diretór Jerál ko’alia nia, (José António Fátima Abílio) hatete tinan ne’e rekruta tan ema 20, maibé ha’u dehan, ema 20 ne’e la too. Atu halo servisu la’o di’ak, iha Alfándega Salele ne’e presiza rekursu 35, para koloka na’in lima (5) ba Fatumea, na’in lima (5) ba Fatululik para sai seksaun ida,”  dehan Diretór  Caldas ba Ajénsia  Tatoli iha Postu Alfándega Salele.

Ho númeru ne’ebé limitadu, Alfándega Covalima mós labele fahe membru ba halo kontrolu iha Postu Alfándega nian ne’ebé harii ona iha fronteira Postu Administrativu Fatululik no Fatumea.

“Postu rua ne’e mamuk, tanba ita nia rekursu laa too,  problema ne’e ita nia Alfándega Nasionál maka sei haree. Agora Polisia Unidade Fronteira (UPF) mak kontrola hela iha ne’ebá, karik ema lori sasán kontra bandu sira sei kaer no prosesa,” tenik nia.

Difikuldade seluk ne’ebé Alfándega Salele hasoru maka karreta operasaun ida (1) de’it no motorizada rua (2) la too atu halo patrulliamentu ba fronteira ho área luan 1.226 km².

Tuir nia haree katak, governu presiza prepara ona rekursu hahú agora, atu ne’e too tempu Estadu implementa Projetu Suai Supplay Base (PSSP) movimentu atividade ema internasionál barak sei vizita mai Timor-Leste hodi servisu iha Suai.

“Sei projetu Suai Supplay implementa ona, ita presiza ema matenek atu servisu, tanba ita kontrola ema barak mai sei hatama reseita barak liután ba kofre estadu,” nia esplika.

Caldas hatutan, mezmu númeru ne’e la sufisiente, maibé nu’udar funsionáriu sira kontinua koopera halo servisu koordenasaun di’ak ho entidade Alfandega, Imigrasaun, Unidade Patrullamentu Fronteira (UPF), Kuarentena,Unidade Polisia Maritima (UMP) no autoridade no povu Covalima hodi kontrola atividade tomak iha fronteira.

Jornalista: Eugénio Pereira

Editór      : Rafy Belo

HAKEREK NO HATÁN

Please enter your comment!
Please enter your name here