Foto/Google.

DILI, 27 setembru 2019 (TATOLI)– Ministériu Agrikultura no Peska (MAP) identifika katak fahi hamutuk 400 maka mate kauza hosi moras African Swine Fever (ASF) mai hosi Áfrika.

Tuir komunikadu ne’ebé Tatoli asesu hosi gabinete MAP haktuir, hahú iha inísiu outubru 2019, iha kazu fahi moras no mate iha Timor-Leste. Kazu hira ne’e barak tebes mak partikularmente relata husi hakiak-na’in iha Dili laran atu identifika kauza husi moras refere, MAP rekolla amostra hosi animál ne’ebé moras no haruka ba Austrália hodi halo teste.

“To’o 19 setembru 2019, MAP alista ona fahi hamutuk 400 mak mate ona iha Dili no 400 seluk ne’ebé moras. Rezultadu ba teste laboratoriál iha Austrália konfirma katak moras ASF (African Swine Fever) tama ona iha Timor-Leste, hosi amostra haruka bá Austrália porsentu 41 indika pozitivamente moras ASF Timor-Leste”, haktuir komunikadu ne’e.

Istórikamente Timor-Leste livre hosi moras ASF tanba ne’e maka dekretu lei Kuarentena no. 21/2003, artigu 56 define klaramente katak bandu importasaun ba fahi no produtu fahi husi nasaun sira ne’ebé afetada ho moras ASF. Bainhira moras ASF la’o namanas iha Ázia.

MAP mós hala’o workshop sobre moras ASF iha loron 13 juñu 2019 hanesan medida preventiva.  Semináriu refere hodi halo diskusaun téknika ho entidade Governu oioin hanesan Alfándega, AIFAESA, PNTL, UNTL, no SERVE hodi esplora posibilidade atu haforsa no kontrola Timor-Leste ninia bioseguransa ba moras ASF.

Moras ASF nu’udar moras viral ba fahi ida ne’ebé orijinadu hosi Áfrika. Moras ASF maski eziste tinan kleur ona iha mundu, maibé to’o ohin loron seidauk iha ai-moruk atu kura no vasina atu prevene moras refere.

Moras ASF daudaun ne’e akontese ona iha nasaun barak iha Ázia. To’o setembru 2019, nasaun iha ne’ebé afetada ona maka hanesan Xina, Vietnam, Kambodia, Filipina, Laos, Myanmar, Korea Norte, no Mongolia (FAO 2019).

Iha Timor-Leste moras ASF sei arriska fahi pur volta de 400.000 cabeças no umakain liu porsentu 70 mak dependente ba kriasaun hodi suporta sira-nia moris.

Relasiona saúde públika, MAP hakarak esklarese katak moras ASF la’ós moras zoonótiku, signifika moras la fó impaktu ba ema nia saúde.

Asaun imediatu ne’ebé oras ne’e halo mak halo suspensaun ba movimentu fahi hosi ba munisípiu sira seluk. Nune’e MAP sei haforsa serbisu iha postu tránzitu animál no ho kolaborasaun husi autoridade seguransa sei serbisu atu restrita movimentu animál husi Dili bá munisipiu sira seluk.

MAP mós iha kolaborasaun di’ak ho governu Austrália hodi foti medida hanesan teste amostra sira hodi bele hetan diagnoze definitiva ba moras ASF. MAP mós halo kolaborasaun ho OIE (Office International des Epizioties ) hodi prodús matéria ba sosializasaun moras refere.

Jornalista :  Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here