Eis Prezidente Repúblika, José Manuel Ramos Horta. Imajen Tatoli/Cipriano Colo

DILI, 3 outubru 2019 (TATOLI)–Eis Prezidente Repúblika, José Manuel Ramos Horta la konkorda ho Parlamentu Nasionál (PN) ne’ebé la autoriza viajen Prezidente Repúblika (PR) ba Indonézia no Japaun.

Horta la konkorda tanba bele fó impaktu ladi’ak ba kooperasaun bilaterál.

“PN tenke hatene letra iha artigu ne’ebé ko’alia kona-ba ne’e. Tenke hatene ninia espíritu katak iha konstituisaun ne’e la’ós atu uza ba situasaun hanesan agora daudaun”, nia tenik hafoin hasoru malu ho Xefe Estadu, Francisco Guterres Lú Olo iha Palásiu Prezidente Nicolau Lobato, Bairru Pité, ohin.

Lee mós: PN La Autoriza Viajen PR Lú Olo ba Indonézia no Japaun

Eis líder rezisténsia ne’e konta tuir katak baibain iha situasaun normál, tenke atua ho baze ida iha letra no espíritu konstituisaun nian, katak PN nunka fó autorizasaun ka la fó autorizauan tanba ida ne’e hanesan kauza formál ida.

Nia hatutan, Prezidente Repúblika figura númeru ida iha nasaun ne’e, eleitu diretamente husi povu, nia mak hanesan emisáriu embaixadór númeru ida iha nasaun ne’e no obrigasaun PR nian mós atu halo kondusaun ba polítika Estadu hodi halo diplomasia.

“Divia karta ne’ebé haruka mai ne’e, Prezidente asina no ba, maibé tanba buat ne’e iha konstituisaun, no tanba iha buat seluk ida, nune’e kansela tiha”, nia esklarese.

Maibé, Horta fó ezemplu katak iha Portugal kuaze tinan haat nulu ona Parlamentu nunka halo kanselamentu ba viajen Prezidente.

“Iha mundu tomak mós seidauk iha esperiénsia katak Parlamentu la autoriza ninia Prezidente nia viajen”, Horta haktuir.

Ho ida ne’e, Horta afirma, nia la konkorda tanba de’it Prezidente la fó pose ba membru Governu pendente na’in sia. Tuir loloos, líder partidu polítiku sira ne’ebé forma Governu tenke hatene halo separasaun ba buat sira ne’e.

Horta konsidera, situasaun ne’e sei bele fó mós impaktu ba kooperasaun ho Indonézia tanba ida-ne’e konvite ba serimónia pose Prezidente Repúblika, Joko Widodo.

Nia dehan, Indonézia la’ós konvida rai hotu maibé konvida rai sira iha Ázia plus Timor-Leste no Japaun Konvida Xefe Estadu hotu iha mundu inklui Timor-Leste. Tanba ne’e, serimónia rua ne’e importante tebes ba Timor-Leste nia diplomasia.

Nia haktuir katak uluk nia sei hanesan Prezidente Repúblika, nia ba partisipa serimónia pose ba Prezidente Indonézia, Susilo Bambang Yudhoyono.

“Agora, Ázia marka prezensa iha ne’ebá maibé Timor-Leste laiha ne’ebá. Ne’e ladi’ak!”, katak Horta.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here