Sesaun plenária Parlamentu Nasionál. Imajen dok. Tatoli

DILI, 30 setembru 2019 (TATOLI) – Parlamentu Nasionál (PN) kontinua la autoriza Prezidente Repúblika (PR), Francisco Guterres ‘Lú Olo’ hala’o viajen ba Indonézia no Japaun.

Parlamentu Nasionál kansela viajen Prezidente Repúblika ba Indonézia ho votu a-favór 29, kontra 31 no abstensaun 0.

Nune’e mós, Parlamentu Nasionál kansela Prezidente Repúblika ba Japaun, ho votu a-favór 29, kontra 31 no abstensaun 0.

“Plenária la aprova viajen Prezidente Repúblika ba Indonézia no Japaun, tanba ne’e Parlamentu Nasionál la autoriza dezlokasaun Prezidente Repúblika nian”, hateten Prezidente Parlamentu Nasionál, Arão Noé de Jesus da Costa Amaral, iha Parlamentu Nasionál, segunda ne’e.

Lee mos: Horta Husu PN Autoriza Xefe Estadu ba Indonézia-Japaun

Deputadu Bankada PLP, Francisco Vasconcelhos, hateten problema iha rai laran importante liu, tanba ne’e tenke rezolve lai hafoin hala’o viajen.

“Ba partisipa tomada pose Jokowi ho serimónia liurai imperadór iha Japaun, ha’u-nia pergunta, se ita partisipa ema seluk nia tomada pose, internamente ita-nian la fó tomada pose ba malu ne’e oinsá. Ita-nia problema agora mós tanba ita la fó tomada pose ba malu”, dehan deputadu PLP ne’e.

Nia afirma, bainhira problema rai laran rezolve ona, sei apoia polítika saida de’it.

Iha fatin hanesan, Deputadu Bankada FRETILIN, Antoninho Bianco, dehan loloos ne’e iha rai laran laiha problema.

“Imi kompara fali kandidatu membru governu na’in 9. Labele buka de’it inimigu ho Prezidente Repúblika durante ne’e. Ne’e sentimentu ódiu vingansa permanente. Xefe Estadu la’ós tuur hakarak ba, maibé ne’e bazeia ba konvite”, dehan deputadu Bankada FRETILIN ne’e.

Iha parte seluk, Deputadu Bankada Partidu Demokrátiku (PD), Adriano do Nascimento, hateten kansela viajen PR Lú Olo’ dala barak ona ne’e problema boot.

“Ita bele fó komentáriu maibé la konvense malu ona  tanba deputadu AMP sira vota kontra viajen Prezidente Repúblika hamutuk dala lima tutuir malu”, haktuir deputadu Adriano.

Enkuantu, deputadu sira seluk lakohi halo deklarasaun kona-ba kanselamentu viajen Prezidente Repúblika, Francisco Guterres Lú Olo.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here