Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 2 setembru 2019 (TATOLI)—Prezidente Parlamentu Nasionál (PPN), Arão Noé de Jesus da Costa Amaral, rekoñese tinan ida ne’e la konsege finaliza Lei Antí Korrupsaun (LAK) tanba sei ajusta referénsia balun.

“Tinan ida ne’e la konsege finaliza Lei Antí Korrupsaun (LAK) tanba la’ós haree de’it ba projetu ne’ebé proponente hosi Bankada FRETILIN aprezenta maibé alarga no kria tan regra balun kona-ba deklarasaun bens ne’ebé Komisaun A trata asuntu Justisa no Konstitusionál ba halo estudu komparativu iha Macau,” nia dehan ba Tatoli, iha Parlamentu Nasionál, ohin.

Nia dehan, Komisaun A nia previzaun katak iha artigu 100 resin ne’e diskute dala ida de’it duké halo rohan-rohan. Di’ak liu halo kedas lei ne’e kompletu.

Lee mós: CEPAD Preokupa PN Adia Beibeik Lei Antí Korrupsaun

“Ne’e opsaun ida di’ak. Maski dada tempu maibé ho objetivu konklui tan krimi sira seluk ne’ebé di’ak liu ba Estadu nia futuru. Deklarasaun bens mós iha laran hotu to’o kargu xefia sira hotu. Iha Macau, funsionáriu tomak ne’ebé manán osan hosi Estadu presta hotu deklarasaun riku-soin. Kabe ba Timor, ita deside atu deside ba to’o iha ne’ebé”, tenik nia iha Parlamentu Nasionál, kuarta ne’e.

Prezidente Parlamentu Nasionál ne’e dehan plenária fó ona kompeténsia ba Komisaun A diskute kona-ba LAK ne’e.

Hanesan Prezidente Parlamentu Nasionál, Arão hateten, nia hein de’it karik Komisaun A diskute hotu ona sei ajenda ba plenária.

 Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here