Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida. Imajen Tatoli/Evaristo Soares Martins

DILI, 2 setembru 2019 (TATOLI)—Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, preokupa Parlamentu Nasionál (PN), liliu Komisaun A ne’ebé trata asuntu Justisa no Konstitusionál adia beibeik diskusaun ba ezbosu Lei Antí Korrupsaun (LAK).

“Ami preokupa tanba sira adia beibeik diskusaun”, nia dehan ba Agência TATOLI, iha nia kna’ar-fatin, Bidau Akadiru-hún, Dili, kuarta ne’e.

Tuir nia haree katak Parlamentu Nasionál laran todan atu aprova lei ne’e ho lalais tanba bainhira Lei Antí Korrupsaun hetan aprovasaun sei kriminaliza fali lei na’in sira-nia interese, sei kriminiza ein-rikesimentu ilísitu katak sai riku hosi kalan ba loron.

Lee mós: Prezidente Komisaun A Rekoñese Difísil Finaliza LAK Tinan ne’e

Boavida haktuir, Lei Antí Korrupsaun foun ne’e mós sei kriminaliza obra Governu nian liliu projetu bainhira buat ruma la’o la loos iha implementasaun ka burla konstrusaun.

“Lei ne’e sei ba hasoru fali lei na’in sira-nia interese. Ne’ebé, di’ak liu lalika debate no aprova. Lei ne’e adia tinan 10 ona. Ita tuur pozisaun hanesan Ministru, kuandu lei ne’e laiha, ita tuur book-aan di’ak hela de’it. Ohin, ita-nia rai (propriedade) laiha, maibé aban ita bele iha rai tolu. Agora, ita-boot mak halo lei hodi bandu no halulik buat sira ne’e hotu no ita-boot barani halulik ita-boot nia-aan hodi sai riku aban? Ne’e defísil!”, hateten Diretór Ezekutivu CEPAD.

Nia subliña, bainhira LAK ne’e Parlamentu Nasionál aprova, kbiit Komisaun Antí Korrupsaun atu implementa lei ne’e iha buat rua. Ida, mak lei tanba lei iha ona. Kbiit seluk mai hosi ema lidera KAK rasik, nune’e labele hakanek dignidade no hakanek integridade.

“Kbiit seluk tan mak KAK tenke barani atu hasoru intervensaun saida de’it”, João Boavida esklarese.

Diretór Ezekutivu CEPAD ne’e rekomenda ba Parlamentu Nasionál, liliu Komisaun ne’ebé trata asuntu Justisa no Konstitusionál tenke prioritiza lei ne’e. “Se la fó proridade, di’ak liu Parlamentu Nasionál lalika ko’alia kombate korrupsaun, tanba lei KAK foun ne’e importante”, katak nia.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here