Diretora Nasionál Veterinária Ministériu Agrikultura no Peska (MAP), Joanita Bendita da Costa. Foto/Natalino Costa.

DILI, 02 outubru 2019 (TATOLI) – Diretora Nasionál Veterinária, Joanita Bendita da Costa, informa pesoál tékniku veterinária na’in-rua husi Austrália sei to’o iha Timor-Leste, aban, hodi fó ajuda ba tékniku veterinária sira husi Ministériu Agrikultura no Peska (MAP) atu halo peskiza ba moras Peste Suína Afrikana (PSA) ka African Swine Fever ( ASF) ne’ebé la’o ona iha país laran.

“Tuir planu sira rua sei to’o aban no ami sei halo enkontru hodi haree bá oin atu la’o oinsá, liuliu atu halo survey ba moras ASF iha Timor-Leste”, Joanita dehan ba Tatoli iha MAP, Komoro, ohin.

Nia dehan tékniku veterinária husi Austrália ne’e mai ho objetivu atu apoia ekipa téknika MAP nian hodi halo peskiza ba moras fahi iha Timor-Leste.

“Sira na’in-rua sei apoia ami hodi halo survey ba moras ASF, atu hatene loloos, será ke moras ne’e iha de’it Dili ka alastra ona bá munisípiu seluk”, adianta.

Notísia relevante : MAP Identifika Fahi Mate Tanba Kauza Husi Moras ASF

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here