Prezidente Sensu Agríkola 2019, Elias dos Santos Ferreira. Imajen/Jogerjo Guterres.

DILI, 02 outubru 2019 (TATOLI) – Prezidente Komité Tékniku Sensu Agrikultura 2019, Elias dos Santos Ferreira, informa sensu agríkola iha ona progresu no iha nivel territóriu atinje ona porsentu 85.

“Sensu Agrikultura estabelese durante fulan rua ona. Ha’u hakarak informa katak to’o iha loron 1 outubru horseik iha nivel teritóriu Timór atinji ona pursentu 85. Ne’e ita haree persentajen ida boot ona, se haree ba munisípiu sira maka ha’u foti uluk ba munisípiu tolu ne’ebé maka ho persentajen boot hanesan Aileu kuaze porsentu 100, Kovalima porsentu 99.3, Vikeke porsentu 98, no tuirmai sira ne’ebé persentajen ki’ik maka hosi munisípiu Ainaru porsentu 67, Baukau porsentu 75 no mós RAEOA porsentu 70”, hateten Prezidente Sensu Agrikultura 2019 iha nia kna’ar fatin Kaikoli, ohin.

Sensu agrikultura ida ne’e lansa iha 13 agustu foin lalais ne’e no ekipa sira hala’o kedas serbisu iha loron 14 fulan refere no iha Rejiaun Administrativa Espesiál Oekusi Ambenu (RAEOA) mak tarde no hala’o iha 25 agostu tanba falta ekipamentu.

Aléinde ne’e Elias dehan sobre obstákulu iha sensu  ne’ebé tékniku sira hasoru mak hanesan iha suku rua (Foholau no Liurai) iha postu administrativu Turiskai, Munisípiu Manufahi tanba suku rua refere seidauk asesu ba enerjia eletrisidade entaun entrevistadór sira labele uza ekipamentu android hodi halo entrevista no uza de’it kestionáriu. Tanba ne’e maka persentajen sei menus.

Obstákulu seluk maka to’os ho natar dook hosi umakain, entaun entrevistadór sira tenke la’o dook hodi bá sukat, no dezafiu ida tan mak saláriu tarde.

Kona-ba obstakulu sira ne’e sei la afeta ba serbisu tékniku sira nian, no saláriu ne’ebé durante fulan rua tarde, oras ne’e rezolve ona no hahú aban halo ona pagamentu.

Elias salienta sobre sensu iha Dili, dala barak ekipa sira bá odamatan taka no ema laiha, nune’e ekipa taka de’it adezivu (sticker).

Tanba ne’e, nia husu populasaun liuliu iha kapitál ne’ebé seidauk hetan sensu bele informa ba autoridade lokál nune’e ekipa tékniku sira tun hikas bá sira-nia hela fatin.

Prezidente Sensu Agríkola ne’e otimista katak sensu sei remata tuir tempu ne’ebé termina ona mak 12 outubru 2019.

Notísia relevante : Rezultadu Sensu Agríkola Sei Hatudu Loloos Estrutura Kada Umakain Agrikultór

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here